درۆن بەسەر کوێستانەکانی برادۆستدا دەسووڕێنەوە و ئاژەڵدارانی ناوچەکە ئاگادارکراونەتەوە ناوچەکانیان چۆڵبکەن

رۆژی یەکشەممە، 17ـی ئەیلوولی 2023، ئەندام جەبار، پەیامنێری تۆڕی میدیایی رووداو لە سیدەکان گوتی، ئێستا دەنگی درۆن دەبیسترێت کە بەسەر ئاسمانی سیدەکاندا دەسووڕێنەوە و بەردەوام خەڵک بە ئۆتۆمبێل ناوماڵەکانیان لە کوێستانەکان دەهێننە خوارەوە".

بەگوێرەی بەدواداچوونەکانی پەیامنێری رووداو، ئەمڕۆ زیاتر لە هەزار ماڵ لە کوێستانەکانی برادۆست ناوچەکانیان جێهێشتووە و ئەوانەش کە لە خوارەوە بوون و ویستوویانە بچن کەلووپەلەکانیان بهێننەوە، رێگەیان پێنەدراوە.

پێشتر، بەرپرسێکی ئیدارەی سۆران بە رووداوی راگەیاندبوو "ئێران ئاگاداری کردووینەتەوە، تاوەکو 19ـی ئەیلوول هەر کەسێک لەو ناوچانە بمێنێتەوە، دەکەوێتە بەر هێرشی درۆن و تۆپخانەکانی سوپای پاسداران، بۆیە ئەمڕۆ هێزی ئەمنی لە ناوچەکە بازگەیان داناوە و رێگە نەدراوە کەس بچێتە ناوچەکانی سیدەکان و باڵەکایەتی".

پەیامنێری رووداو دەڵێت، ترس و دڵەڕاوکێیەکی زۆر لەنێو دانیشتووانی ناوچە سنوورییەکاندا دروستبووە و لە ئیدارەی سۆران ماڵەکان ئاگادارکراونەتەوە تا کاژێر 12:00ـی ئەمشەو هیچ ماڵێک لەو کوێستانانە نەمێنێت و هاوکات لە شەوی رابردووەوە تاوەکو ئێستا درۆن بەسەر ئەو ناوچەیەدا دەسووڕێنەوە.

ئێران و عێراق لە 19-03-2023 رێککەوتنێکی ئەمنییان لە بەغدا واژۆ کرد بۆ بەهێزکردنی هاوئاهەنگیی ئەمنی و پاراستنی ئاسایشی سنووری هاوبەشی نێوان دوو وڵات.

رێککەوتنەکە دوای ئەوە واژۆ کرا کە ئێران داوای لە حکومەتی عێراق کرد، حیزبەکانی رۆژهەڵاتی کوردستان چەک بکات و رێگە نەدات لە خاکی ئەو وڵاتەدا چالاکییان هەبێت و دوا وادەش بۆ جێبەجێکردنی ئەو رێککەوتنە 19ـی ئەیلوولی 2023یە.