رووداو دیجیتاڵ
بەڕێوەبەرایەتی گشتیی ئاسایشی هەولێر، دەستگیرکردنی تۆمەتبارێکی بە 85 مۆری ساختەوە راگەیاند.
رۆژی شەممە، 16-12-2023، بەڕێوەبەرایەتی گشتیی ئاسایشی هەولێر لە راگەیێندراوێکدا گوتی، "دوای وەرگرتنی رەزامەندیی دادوەری لێکۆڵینەوەی ئاسایشی هەولێر، لەلایەن هێزەکانمانەوە تۆمەتبار (ع. ی. ع.) بە تۆمەتی ئەنجامدانی کاری ساختەکاری و دروستکردنی مۆری ساختە دەستگیر کرا."
بەگوێرەی راگەیێندراوەکەی ئاسایشی هەولێر، "لە لێکۆڵینەوەکاندا دەرکەوتووە ئەم تۆمەتبارە لەژێر ناوی کۆمپانیایەک هەستابوو بە ساختەکردن و دروستکردنی نووسراوی رێکخراوە نێودەوڵەتییەکان و دەزگا خێرخوازییەکان و دروستکردنی مۆر و پسوولەی ساختە."
ئاسایشی هەولێر دەڵێت، "بەناوی چەندین کۆمپانیای نادیار(وەهمی) تەندەری پێشکێشی رێکخراوە خێرخوازییەکان کردووە و چەند تەندەرێکی دیکەشی وەرگرتووە و لەکاتی دەستگیرکردنیدا لەلایەن هێزەکانمان لە ئاسایشی هەولێر دەستگیرا بەسەر (85) مۆری ساختە و چەند چەکێکی بێ مۆڵەتدا."
