دوو ساڵ زیاترە حاجیاوا بووەتە قەزا و قایمقامی نییە

پێشتر بزووتنەوەی گۆڕان ئەزوەر جەعفەر بابەکر کە ئێستاش لە پۆستی بەڕێوەبەری ناحیە لە شارەکە دەوام دەکات، وەک بەربژێر بۆ پۆستی قایمقام دەستنیشان کردووە و ناوی لە وەزارەتی ناوخۆیە، بەڵام بەهۆی ئەوەی یەکێتیش بەربژێری خۆیان هەبووە کێشە دروست بووە و تا ئێستا ئەو پۆستە پڕنەکراوەتەوە. 

ئەزوەر جەعفەر بابەکر بە تۆڕی میدیایی رووداوی راگەیاند، ''بەڕاستی شەرم دەکەین لەسەر ئەو بابەتە قسە بکەین، لە تام چووەتە دەرێ و مەعقووڵ نییە بڕیارێک کە نزیکەی سێ ساڵە دەرچووە کەس خۆی لێناکاتە خاوەن، واتە نە یەكێتی و نە گۆڕان کە ناکۆکییان هەیە لەسەر ئەم پۆستە بە خەیاڵیشیاندا نایێت، جگە لە چەند خەمخۆرێکی حاجیاوا کەس قسە لەسەر دانانی قایمقامێک بۆ قەزاکە ناکات.''

بەڕێوەبەری ناحیەی حاجیاوا ئاماژە بەوەش دەکات، ''هەموو رێکارەکان لای هیوا قەرەنی، سەرپەرشتیاری ئیدارەی راپەڕین و حیزبەکەیەتی کە یەکێتییە، بەڵام بە ئاشکرا نایکەن، ئەگەرنا سبەی دەتوانێت نووسراوێک بکات و وەزارەتی ناوخۆش قبووڵی بکات، بەڵام یەکێتی چاوی لە پۆستی قایمقامی بازیانە و دەیەوێت پۆستی قایمقامی حاجیاواش وەربگرن.'' 

پشتیوان عەزیز، پارێزەر و یەکێک لە ئەندامانی دەستەی بە قەزابوونی ناحیەی حاجیاوا لەبارەی دانەنانی قایمقامێک بۆ قەزاکە دەڵێت، گرفتی سیاسی و حیزبی لەنێوان یەکێتی و گۆڕان بووەتە کێشە لەبەردەم دانەنانی قایمقامێک بۆ قەزاکەیان. 

وەکو ئەو پارێزەرە باسی دەکات، ''هەرچەندە ئەوە پشکی گۆڕانە و یەکێتیش بە مافی خۆی دەزانێت، هەروەها قایمقامی پشدەر لە دەست بزووتنەوەی گۆڕاندایە و ئێستا یەکێتی دەیەوێت ئەویش وەربگرێتەوە، ئەوەش لە رووی سیاسی و کارگێڕی و ئیداریی و یاساییەوە گرفتی لە بەردەم بەقەزابوونی حاجیاوا دروستکردووە.'' 

سەرپەرشتیاری ئیدارەی راپەڕین کۆتایی ساڵی 2023 بەڵێنی بە دەستەکە داوە، "کەسێک بەوەکالەت رابسپێرێت و بکرێتە قایمقامی قەزای حاجیاوا،" ئەمە بە گوتەی پشتیوان عەزیز، بەڵام دەڵێت، "بەداخەوە نەکرا و ئەم ساڵیش سەردانی لوقمان وەردی، بەپرسی مەڵبەندی یەکێتیمان کرد و بەڵێنی پێداین، بەڵام ئەوەشیان بێ وەڵام مایەوە." 

لەو بارەیەوە هیوا قەرەنی، سەرپەرشتیاری ئیدارەی راپەڕین بە تۆڕی میدیایی رووداوی راگەیاند، ئەو پۆستە بۆ یەکێتییە و ناوی بەربژێرەکەش دراوەتە وەزارەتی ناوخۆ، "چاوەڕێین وەزارەت بڕیاری لێ بدات."

رووداو لە سەرچاوەیەکی باڵاوە زانیویەتی کە "حەسەنە گەورە وەک بەربژێر بۆ پۆستی قایمقامی حاجیاوا لە پشکی یەکێتی ناوی چووەتە وەزارەتی ناوخۆ، بەڵام تاوەکو ئێستا وەزیری ناوخۆ واژۆی لەسەر نەکردووە." 

قەزای حاجیاوا دەکەوێتە سنووری پارێزگای سلێمانی و لەگەڵ چەند ناوچەیەکدا هاوسنوورە، لە بەشی باکووری لەگەڵ ھەریەک لە قەزاکانی رواندز و شەقڵاوە کە سەر بە پارێزگای ھەولێرن، لە بەشی باشوور و باشووری رۆژھەڵات زێی بچووک و قەزای دووکانە و لە بەشی رۆژھەڵاتی قەزای رانیە و بەشی رۆژئاوا و باشووری رۆژئاوای قەزای کۆیە و لەسەر ئاستی ھەرێمی کوردستان و ناوچەی لێکۆڵینەوە دەکەوێتە بەشی باکووری رۆژھەڵات.

 حاجیاوا لە 21ی تەممووزی 1999 بە واژۆی سەرۆکی حکومەتی ئەوکات کۆسرەت رەسوول عەلی بووە ناحیە، لە 6ی تشرینی دووەمی 1999 یەکەم بەڕێوەبەری ناحیە محەممەد ئیبراهیم دەست بەکاربووە.

 لە 17ی ئایاری 2004 دووەم بەڕێوەبەری ناحیە رەمک رەمەزان دەستبەکار بووە، لە 8ی کانوونی یەکەمی 2010 سێیەم بەڕێوەبەری ناحیە نەھرۆ سەردار محەممەد دەستبەکاربووە و لە ساڵی 2013ـەوە ئەزوەر جەعفەر بابەکر، بەڕێوەبەری ناحیەیە. 

رۆژی 22-2-2022 وەزیری ناوخۆی هەرێمی کوردستان بە نووسراوێکی فەرمی کە ئاراستەی سەرۆکایەتیی ئەنجوومەنی وەزیرانی کرد، لارینەبوونی خۆی لەسەر بە قەزاکردنی ناحیەی حاجیاوا لە سنووری ئیدارەی راپەڕین لە پارێزگای سلێمانی دەربڕی. 

لە رۆژی 21-04-2022 بە واژۆی مەسرور بارزانی، سەرۆکوەزیرانی هەرێمی کوردستان حاجیاوا بە فەرمی بووە قەزا. 

ئاکام عەزیز ، مامۆستای زانکۆ و سەرپەرشتیاری دەستەی بە قەزاکردنی ناحیەی حاجیاوا بە تۆڕی میدیایی رووداوی راگەیاند، "بابەتەکە بووەتە بابەتێکی سیاسی و ئەمەش وایکردووە کە حاجیاوا بەراورد بە رابردوو لە پڕۆژەی خزمەتگوزاری زۆر بچێتە دواوە."