رووداو دیجیتاڵ
قایمقامی قەزای تەقتەق رایگەیاند، دوێنێ چوارەمین فێستیڤاڵی هەنجیر بەڕێوە چوو و 17 هەزار گەشتیار سەردانیان کردووە.
فێستیڤاڵەکە 15ـی ئەم مانگە، بە ئامادەبوونی پارێزگاری هەولێر و بە سەرپەرشتیی دەستەی گەشتوگوزار بەڕێوە چوو.
رۆژی شەممە، 16ـی ئابی 2025، ئاسۆ مستەفا، قایمقامی قەزای تەقتەق بە تۆڕی میدیایی رووداوی راگەیاند: "بڕیار بوو فێستیڤاڵەکە دوو رۆژ بێت، بەڵام بەهۆی زۆریی گەشتیاران لە یەکەم رۆژدا هەموو بەرهەمەکان فرۆشران و رۆژی دووەم بەڕێوە نەچوو."
زیاتر لە 50 جووتیار بەرهەمەکانیان نمایش کرد و بەشدار بوون لە فێستیڤاڵەکەدا. قایمقامی قەزای تەقتەق گوتی: "جگە لە هەنجیر، بۆ یەکەمجار نەوتی شیواشۆک لە فێستیڤاڵەکەدا نمایش کرا و بووە جێگەی سەرنجی زۆری گەشتیاران."
پار لە ماوەی دوو رۆژدا، نزیکەی 10 هەزار گەشتیار سەردانی فێستیڤاڵەکەیان کردبوو. بەگوتەی ئاسۆ مستەفا، "ئەم ساڵ تەنیا لە یەک رۆژدا، 17 هەزار گەشتیار هاتن و 7 تۆن هەنجیر فرۆشرا".
پار لە تەقتەق نزیکەی 900 تۆن هەنجیر بەرهەم هێنرابوو. قایمقامی قەزاکە دەڵێت: "ئەم ساڵ هەزار تۆن هەنجیر هەبووە، رۆژانە 50 تۆن دەفرۆشرێت".
