شاندی ئیمراڵی نێوەڕۆکی پەیامی عەبدوڵڵا ئۆجەلانیان گەیاندە سەرۆک بارزانی

دوێنی شەممە، شاندی ئیمراڵی گەیشتە هەولێر. شاندەکە پێکدێت لە پەروین بوڵدان، پەرلەمانتاری دەم پارتی، سری سورەییا ئۆندەر، بریکاری سەرۆکی پەرلەمانی تورکیا، کەسکین بایندر هاوسەرۆکی دەبەپە، بەردان ئۆزتورک، هاوگوتەبێژی پەیوەندییە دەرەکییەکان و پارێزەرانی یاسایی و بەرپرسانی پارتەکە.

بارەگای بارزانی لە راگەیێندراوێکدا دەڵێت، لە دیدارەكەدا شاندی ئیمراڵی، بیروبۆچوونی خۆیان لەبارەی بارودۆخی سیاسی و پڕۆسەی ئاشتی لە توركیا و وردەكاری و ئەنجامی دیدارەكانیان لەگەڵ بەڕێز عەبدوڵڵا ئۆجەلان بۆ سەرۆك بارزانی خستەڕوو. هەروەها "ناوەڕۆكی پەیامی بەڕێز (عەبدوڵڵا ئۆجەلان)ـیشیان بە سەرۆك بارزانی گەیاند."

بەگوێرەی راگەیێندراوەکە، سەرۆک بارزانی "جەختی لە بایەخی پڕۆسەی ئاشتی وەك تاكە ڕێگەی دروست بۆ گەیشتن بە چارەسەری كردەوە" و بە پێویستی زانی  "هەموو لایەک هەوڵی خۆیان لەوەدا چڕ بكەنەوە كە پڕۆسەی ئاشتی بگاتە ئەنجام."

لە راگەیێندراوەکەدا هاتووە، "سەرۆك بارزانی ئامادەیی تەواوی خۆشی بۆ یارمەتیدان و پشتیوانیی پڕۆسەی ئاشتی لە توركیا و سەرگرتنی" بە شاندەکە ڕاگەیاند.

شاندی دەم پارتی پێش سەردانەکەیان بۆ هەولێر رایانگەیاند، دوای دیداریان لەگەڵ سەرۆک بارزانی، لەگەڵ نێچیرڤان بارزانی، سەرۆکی هەرێمی کوردستان کۆدەبنەوە و دواتر سەردانی سلێمانی دەکەن و لەگەڵ هەریەک لە بافڵ تاڵەبانی، سەرۆکی یەکێتیی نیشتمانیی و قوباد تاڵەبانی  جێگری سەرۆکی حکومەتی هەرێمی کوردستان کۆدەبنەوە