بافڵ تاڵەبانی: ئەوەی لە هەرێمی کوردستان هەیە دوو ئیدارەییە

بافڵ تاڵەبانی: بۆ نەیهێنیم بۆ هەولێر؟ خۆ ئێمە ئیعتیراف بە ئەمر قەبزەکە ناکەین و نا قانوونییە. چۆنیش هێنامان؟ کاک وەهاب دەیویست بچێت بۆ شوێنێک (ناوێرم شوێنەکەت پێبڵێم چونکە دەترسم عەزێتیان بدەن)، خۆ بە دزییەوە نەمانهێناوە، بمویستایە کاک وەهاب بهێنم، بە هێلیکۆپتەرێک نەمەهێشت کەس بزانێت لەناو مەکتەبی سیاسی دادەبەزیم. کاک وەهاب هاتووە، خەڵکی تریشمان هێناوە پێشتر، ها! ئاوا بەو تەریقەیە، چەند شتێک هەن وەکو یاسایە و نەنووسراوە لە نێوانمان، لە تەلەڤیزیۆن و ئیعلام بڵاوی ناکەینەوە، هاتین، لەوێ دانیشتین لە فڕۆکەخانە تۆزێک دوایانخستین (کە ئەوەش تۆزێک شتێکی ناشرین بوو)، بەڵام ئێمە هیچ قسەمان نەکرد و گوتمان بابە ئێمە دەگەڕێینەوە و کێشەمان نییە. خۆی بەو حسابە بێت نەدەبوو منیش بێم بۆ هەولێر، خۆ منیش ئەمر قەبزم هەیە براکەم! نەدەبوو قوبادیشم لەگەڵ بێت، قوبادیش ئەمر قەبزی هەیە، ئەمە زۆر سەیرە! زۆر زۆر عەجیبە..! هەولێر پایتەختی کوردستانی عێراقە، ویلایەتی یەک لا نییە، ویلایەتی حیزبێک نییە، ویلایەتی بنەماڵەیەک نییە. هەولێر پایتەختە. 

بافڵ تاڵەبانی: قاتڵەکان دەمێکە ئاشكرا بوون، بەڵام نازانم بۆ لە مەحکەمە چەقیوە؟ هەموومان دەزانین کێ ئەوەی کرد.

بافڵ تاڵەبانی: ئێستا نازانم کەیسەکە لەکوێیە، چونکە باسی ئەوەیان کردبوو کەیسەکە بگوێزنەوە بۆ هەولێر.

بافڵ تاڵەبانی: دەبێ ئەو پرسیارە لەوە بکەیت کە داوایکردووە کەیسەکە بگوێزرێتەوە بۆ هەولێر.

بافڵ تاڵەبانی: ئێستاش مەدحی دەکەم، هەندێ شتی کرد وەختی خۆی کە مایەی شانازی بوو، وەختی خۆی ئەفسەرێکی ئازا بوو، من خۆم بینیومە، هەندێک ئۆپەراسیۆنی زۆر زۆر گرنگی کرد، بەڵام سەلمان تووشی غەڵەت بوو، خۆ کۆتایی دونیا نەبوو لە پۆستەکەی نەما، پۆستێکی تری بۆ حازر کرابوو، نەڕۆشتبوو بۆ ئەوێ. موشکیلەی ئێمە ئەژی نییە، واز لە ئەژی بێنە هەر سەری خۆتی پێ مەئێشێنە.

بافڵ تاڵەبانی: داوای لێبووردنت لێدەکەم، وا نەبوو، حەز دەکەم پێت بڵێم: ئەژی ئەمین (سەلمان-چی پێ ئەڵێی؟) چەند مانگێکە دەزگایەکی ئەمنی ئێمەی بەجێهێشتووە، ئێمە مەعلووماتمان لایە کە شتی لەگەڵ خۆی بردووە، شکێکیشمان هەبوو کە هێشتا لەو ماڵانەیە شتەکانی. بۆ؟ چونکە کە ئێرەی بەجێهشت، بەنیاز نەبوو نەگەڕێتەوە، زرووفەکە وایلێهات نەگەڕایەوە، بە ئەمری حاکم، بە هەموو شتێک، ئێمە دەچووین تەفتیشی ئەو شوێنانە بکەین، بەڵام پێش ئەوەش، لەگەڵ برادەرێکی خۆمان لەناو پارتی قسەمان کرد، وتمان: ئێمە ئەمە دەکەین. بێزەحمەت با ماڵ و مناڵەکانی بڕۆنەوە بۆ هەولێر. ئێمە نەچووینەتە سەر ماڵ و منداڵ و دایکی کەس، ئەمە غەڵەتە. پێمان گوتوون: کاکە ئێمە دێین ئەوە دەکەین. 

بافڵ تاڵەبانی: بەڵێ، بەڵێ! بە قانوون، بە ئەمری حاکم. کاکە لە ئەمریکا چوونە سەر ماڵی دۆناڵد ترەمپ لەسەر یەک کاخەز، من دوو پیکاب هارد درایڤ، نامە، ئارکایڤ (ئەرشیڤ) و زانیاریم لەو ماڵە پەیاکرد. با تۆزێ قڵپیشی کەمەوە؛ مەسئوولی پاراستن، رایکردبا بۆ ئێرە، وا تەعاموولیان لەگەڵ دەکرد لەوێ؟  

بافڵ تاڵەبانی: لێت ناکەم، جوابی مەدەرەوە. بەڵام ئەزانی چۆنە؟ چەند مانگێکە ئەم پیاوە بە کەیفی خۆیان لێرە دێن و دەڕۆن، حەرەسیان هەیە، چەکیان پێیە، چەکدار دێ و دەڕوا، قەت ئیزعاجمان نەکردوون، بەڵام وەزعەکەش خەتەربوو ها، تەقینەوە لە سلێمانی، تەقینەوە لەوێ، من لەوە دەترسام خوا نەکردە یەکێک شتێک لە ماڵ و منداڵی بکات، دیسان فلیمێکی تری بۆڵیوودیان دروست دەکرد و دەیانگوت ئەوە بافڵە. نامانەوێ کاکە، ئەو مەسئوولییەتە هەڵناگرم. ماڵ و منداڵی خۆتە بیبە بۆ لای خۆت، بۆ ئەتەوێ لای من بێ؟ بیبە لای خۆت. 

بافڵ تاڵەبانی: بەڵێ ئێمە ئامادەین.

بافڵ تاڵەبانی: چاک! چیان دەوێ ئێمە ئامادەین. دەیانەوێ دانیشین، با دانیشین. دەیانەوێ هەموومان بەیەکەوە دانیشین با دانیشین، چۆن دەیانەوێ؟ لە چ مستەوایەک و لەکوێ بێت؟ دەیانەوێ ئەجنەبی تێدا بێت وەکو شاهێد ئامادەین، دەیانەوێ خۆمان بەیەکەوە دانیشین ئامادەین. دەیانەوێ لە ئەمریکا دابنیشین؛ دادەنیشین. قەت دەرگەی گفتوگۆمان دانەخستووە.

بافڵ تاڵەبانی: ئەبێ ئێمە بڕیار بدەین. 

بافڵ تاڵەبانی: بەڵێ هەردوولا. بڕیاربدەین ئەو خەڵەتانەی کە روودەدەن ستۆپێکیان بۆ دابنێین، من دەمەوێت عەدالەتێک هەبێت لە بەینی هەولێر و ئێرە، ئەوە پێشنیازی منە، وەرە با هەموو داهاتەکان کۆبکەینەوە، چ سیستمێکیان دەوێت ئێمە ئامادەین. بەڵام با بە عەدالەت ئیشەکان بکرێت. یەک داواکاریی شەخسیمان نییە. بەڵام ئەم وەزعەی ئێستا تەحەموول ناکرێت. تەلەبە برسییە، کەمئەندام برسییە، پێشمەرگە برسییە، هەمووی برسییە.. هەمووشی لێرە برسییە، بۆ؟ بە چ حەقێک بەیانی هەڵدەسم مەعاشی دژەتیرۆر بڕاوە؟ ئەمە بڕاوە، ئەمە بڕاوە.. ئەمە چ شەراکەتێکە؟ بە چ حەقێک ئەو بڕیارە دەدەیت؟

بافڵ تاڵەبانی: هەر لێرەیە. مەعاشیان بڕیوین، پارەیان بڕیوین. هەر لێرەیە، ئازووقە بۆ پێشمەرگەی من نایەت، بۆ پێشمەرگەی لایەنی دیکە دێ. بۆ؟ ئەزانی چۆنە؟ خەریکە خەتی سوور تێپەڕێنن. دەستبردن بۆ دەزگای ئەمنی یەکدی خەڵەتە و نەتیجەکەی خراپە. دەستێوەردانی هێزەکانی پێشمەرگە و هێزە تایبەتەکانمان و بەسیتترین پێشمەرگەی من، نەتیجەکەی خراپە. ئێ بۆ وا دەکەی؟

بافڵ تاڵەبانی: بەڵێ وایە.

بافڵ تاڵەبانی: بەڵێ وایە. کاک شاهۆ! بۆیە ئێمە ئەوەندە بەسەبر بووین، بۆیە کە ئەوان لێرە هێز دروست دەکەن، بەڵام ئێمە هێز دروست ناکەین. بۆیە کە خەڵکی ئێمە دەفڕێنن ئێمە خەڵکی ئەوان نافڕێنین. بۆ کە عەزێتی کادرەکانی ئێمە دەدەن ئێمە لێرە عەزێتی کەس نادەین. ئێ لەبەر خەڵکمە، منیش قەلەقم لەبەر خەڵک. من بێتاقەتم کە تەلەبەکانم دیسان لەسەر جادەن. من بێتاقەم کە وەزعەکەی ئەم زۆنە وایە. پێویستیش ناکات وابێ، ئێمەش لەبەر ئەوەمانە کاکە شاهۆ. وەڵڵا ئێمەش لەبەر ئەوەمانە. کاکە ئێمەین راکەڕاکە دەکەین بۆ هەولێر، دەزانی چەند شاندم ناردووە بۆ ئەولا و چەند شاندیان ناردووە بۆ ئێرە؟ دەزانی چەندجار چووم بۆ لای کاک مەسعود و جەنابی چەندجار هاتوون بۆ ئێرە؟ دەزانی چەندجار چوومەتە لای جەنابی کاک نێچیرڤان و چەند جار هاتوونەتە ئێرە؟ دەزانی چەندجار چووم بۆ لای کاک مەسرور و چەندجار ئەوان هاتوون بۆ ئێرە؟ وازحە کێ هەوڵدەدات؟ 

پێم ناخۆشە کە پەیوەندییەکەمان باش نییە، رەنگە جەنابت تێبینی بکەیت، هەر لەم چەند رۆژە سەیری سۆشیاڵمیدیا بکە، چەند جنێو بە ئێمە دەدرێت، دیسان دەستیانکردووەتەوە بە جنێودان بە مامۆستا برایم، بەعزێ جار جنێودان بە مام جەلالیش، من حەزەکەم ببینیت ئێمە چۆنین بەرامبەر ئەوان، کەس بۆی نییە باسی جەنابی مەلا مستەفا بکات، کەس بۆی نییە باسی جەنابی کاک ئیدریس بکات، کەس بۆی نییە قەت باسی کاک مەسعود بکات، من سەرکردایەتیم عقووبەداوە کە یەک قسەیکردووە لە سۆشیاڵمیدیای خۆی. ئێمە زۆر رێزیان لێ دەگرین، بەس بەداخەوە هەموو جارێک کە عیلاقەتەکە دەچێتە پێشەوە، شتێک روودەدات. 

جارێک لە بەغدا بووم، هاتمەوە بۆ سلێمانی تەلەفۆنیان بۆ کردم، جەماعەتی ئیتار: "چۆن وا لە کاک مەسعود دەکەی؟" چی لە کاک مەسعود دەکەم؟ "کاک مەسعود چاوەڕێتە لە هەولێر، کۆبوونەوەتان هەبووە و نەڕۆیشتووی" هەر شتی وام نەبیستووە! تەلەفۆنم کرد بۆ ئەملاولا و ئێوارەکەی درەنگ، جەنابی کاک مەسعودم دۆزییەوە. کاک مەسعودیش ئاگای لەمە نەبوو. ئەمە دەستە. ئەچم بۆ لای جەنابیان دەڵێن: بەرنامە هەیە فڵان و فڵان تیرۆر بکرێن. چ قازانجی منە فڵان تیرۆر بکرێت؟ ئێ ئەمە دەستە. ئەمەی کە ئێستاش روویداوە، ئەوەش دەستە. بۆ من زۆر وازحە.. نازانم جەنابی بۆ ئەوە نابینێ، نایبینێ کە چەند وازحە یەکێک دەیەوێ ئێمە بەینمان تێکبچێ! بۆ من زۆر زۆر وازحە. بەڵام ئەمە جیاوازە، جەنابی کاک مەسعود خۆی بە من دەڵێ: تەفاسیلی شتەکان من نیم. ئێ باشە! ئەوەی لە تەفاسیلی شتەکانە غەڵەتی گەورە دەکات. غەدر لە خۆی و کوردستان دەکات. غەدر لە حکومەت دەکات، غەدر دەکات لە هەموو شتەکان. وەرە با دانیشین چاکی بکەینەوە، وەڵڵا ئێمە ئامادەین. وەڵڵا ئێمە هیچ موشکیلەمان نییە، وەڵڵا ئێمە رقمان لە کەس نییە. من سوعبەتێکم لەگەڵ کردی و وتم: دکتۆر فوئادمان کرد بە کارگێڕی مەکتەبی سیاسی. وابوو. تەوقەیەکم لەگەڵ کرد و وتم: ئەوە بووی بە کارگێڕ. پێکەنی و چووینە ژوورەوە دانیشت، وتی: بۆ منتان هێناوەتە ئێرە؟ وتم: قسەیان لەگەڵ بکە، بزانە رای کارگێڕی مەکتەبی سیاسیی یەکێتی چییە؟ یەک لەدوای یەک لە تووندڕەوەکانەوە یەک لەدوای یەک بە نەوعێک باسی کاک مەسعودیان کرد، بە نەوعێک باسی عیلاقاتی ئێمە و ئەوانیان کرد کە خۆی تەسەوری نەدەکرد و حەپەسا بوو. کاکە ئێمە نیەتمان وایە، بەڵام هیچ نایەتەوە بەرامبەری. هیچ شتێک ناگۆڕێت، وەزعەکە خراپتر دەبێ و باشتر نابێ. 

بافڵ تاڵەبانی: خەریکبووین نامەیەکمان ئامادە دەکرد، بەڵام کوشتنی هاوکار جاف، یان شەهیدکردنی هاوکار جاف. من پرسیارم ئەوەیە بۆ ئەوە تێکیداوە؟ تۆ جارێ وەرە ئیسپاتی بکە کە منم یان پیسپاتی بکە کە یەکێتییە، ئەوسا دەتوانین بڵێین کە ئەوە تێکیداوە، بەڵام بە راستی مەحکەمە لە تەلەڤیزیۆن ناکرێ، لە هیچ شوێنێکی دونیا مەحکەمە لە تەلەڤیزیۆن ناکرێ. ئەو ڤیدیۆیانە هەزار و یەک غەڵەتیان تێدابوو، کەیسەکە وا جیدی نەبووایە و یەکێک شەهید نەکرایە، ماڵ و منداڵی تێدا نەبووایە، من بەو ڤیدیۆیە پێدەکەنیم. بەڵام بەداخەوە ئەوە کارەساتە. 

بافڵ تاڵەبانی: من پەیوەندیم لەگەڵ کاک نێچیرڤان خۆشە، بەڵام تا چەند هەفتەیەک پێش ئێستاش پەیوەندیم لەگەڵ جەنابی کاک مەسعودیش خۆشبوو، پەیوەندیم لەگەڵ جەنابی کاک مەسروریش خۆشبوو، دەبێت فەلسەفەکەیان بگۆڕن. جۆری ئیشکردنیان لەگەڵ یەکێتی بگۆڕن تا ئێمە بۆ پێشەوە بڕۆین. ئەوە بە یەک کەس و دوو کەس ناکرێت و پێویستی بە گۆڕانکارییە لە ستراتیژییەتی حیزبەکە. بە قسەی خۆش، بە ئیتیفاق، بە گفتوگۆ و دانوستاندن هەموو شتێک دەکەین ئێمە، هەموو جارێک کردوومانە و یەکێتی تەنازولی کردووە، هەموو جارێک یەکێتی ئامادەبوو تەنازول بکات بۆ میللەتەکەمان، ئێستاش ئامادەین، بەڵام بەرامبەر با هەنگاوێک بێتە پێشەوە، ئێ نایەتە پێشەوە و ئیستۆپیان کردووە. من تەسەور ناکەم کاک نێچیرڤان بەتەنیا بتوانێت ئەم ئیشە بکات. وەک چۆن تەسەور ناکەم جەنابی کاک مەسرور بەتەنیا بتوانێت بیکات. ئەمە پێویستی بە گۆڕانکارییە لە ستراتیژییەتی پارتی دیموکراتی کوردستان نەک تەنیا بەرامبەر ئێمە، بەرامبەر حیزبەکانی تریش، بەرامبەر کەسایەتییەکان کە رەنگە ئێستا لە حیزبێکدا نەبن. بەرامبەر مەلاکان و مامۆستا ئایینییەکان و هەموو ئەمانە. ئێمە ئاشتبوونەوەیەکی گشتیمان پێویستە بۆ خزمەتی خەڵک، واش زیاتر دەنگ دێنن ها.