رووداو دیجیتاڵ
بەڕێوەبەری گشتیی گواستنەوە لە وەزارەتی گواستنەوە و گەیاندنی هەرێمی کوردستان رایگەیاند لەکۆی 81 هەزار تەکسی نزیکەی 22 هەزاریان کارتی زانیاری، لەزگە و کۆد و شریتییان بۆ کراوە، دەشڵێت 31/10/2021 دوا مۆڵەتە بۆ ئەو شۆفێرانەی تەکسی کە کارەکانییان نەکردووە و دوای ئەوە سزا دەدرێن.
سەلاح جەوهەر، بەڕێوەبەری گشتیی گواستنەوە لە وەزارەتی گواستنەوە و گەیاندنی هەرێمی کوردستان بە تۆڕی میدیایی رووداوی راگەیاند: "تاوەکو ئێستا لەکۆی 36 هەزار تەکسی لە هەولێر 12 هەزار و 700یان کارتی زانیاری و لەزگە و شریت و کۆدیان تەواوکردووە، 18 هەزار و 580ی دیکەشیان فۆرمیان وەرگرتووە بۆ ئەوەی کارەکان بکەن، لە پارێزگای سلێمانی لەکۆی 27 هەزار تەکسی 3 هەزار و 650 تاکسی و لە پارێزگای دهۆکیش لەکۆی 18 هەزار تەکسی 5 هەزار و 300یان کارتی زانیاری و لەزگە و شریت و کۆدیان تەواوکردووە، 8 هەزار و 850 تەکسیش فۆرمیان وەرگرتووە".
بەڕێوەبەری گشتیی گواستنەوە داوا لە شۆفێرانی تەکسی لە سەرجەم پارێزگاکانی هەرێمی کوردستان دەکات بەدەم کارەکانییانەوە بچن بۆ ئەوەی تاوەکو پێش رۆژی 1/11/2021 کارەکانیان تەواوبکەن، چونکە دوایین مۆڵەتە و نوێناکرێتەوە. پێشتر ئەو مۆڵەتە لە 1ی ئابەوە بۆ 31/10/2021 درێژکرایەوە.
سەبارەت بە گرنگی ئەو کارە، سڵاح جەوهەر گوتی: "زۆر گرنگە، چونکە کاری شۆفیری تەکسی لە کوردستان بەپیشەیی دەکرێت، هەروەها هێشتا بەشێک لە تەکسییەکانی ناوشار و دەرەوەش تۆمارنەکراون و جیانەکراونەتەوە، ئەو تۆمارکردنە بۆ ئەوە باشە کۆنتڕۆڵکردنی کاری شۆفێریی تەکسی دەکات و لە کاتی هەر حاڵەتێکی نەخوازراو بە ئاسانی دەتوانرێت زانیارییان لەسەر وەربگیرێت، لەگەڵ ئەوانەشدا لێرە و لەوێ هەندێک گلەیی لە بەشێک لەشۆفێرانی تەکسی هەبوون لە بوونی حاڵەتی نەشیاو ئیدی ئەوە نامێنێت، چونکە زانیاریی تەکسییەکە لەسەر تەکسییەکە دەبێت و سەرنشین دەتوانێت پەیوەندیی بکات لەهەر حاڵەتێکی نەخوازراودا".
سەلاح جەوهەر، بەڕێوەبەری گشتی گواستنەوە لەوەزارەتی گواستنەوە و گەیاندنی هەرێمی کوردستان ئاماژەی بۆ ئەوەشکرد کارەکانی دەرهێنانی کارتی زانیاری و لەزگە و کۆد شریت بۆ شۆفیران کاریگەریی زۆر باشی هەیە لە جیاکردنەوەی تەکسیی ناو شار و دەرەوەی شار و هەروەها جیاکردنەوەی تاکسیی پارێزگاکان لە یەکدی، چونکە تەکسییەکانی هەولێر رەنگی سوور و ئەوانەی پارێزگای سلێمانی نیلی و ئەوانەی پارێزگای دهۆکیش رەش دەبێت و بەئاسانی جیادەکرێنەوە.
