رووداو دیجیتاڵ
هەرچەندە سێ وەزیری بزووتنەوەی گۆڕان رایانگەیاند دەستلەکاردەکێشنەوە، بەڵام تاوەکو ئێستاش دەوام دەکەن. یەكێک لە وەزیرەکان دەڵێت، تاوەکو رێکارە کارگێرییەکان تەواو دەبن، دەوام دەکەم.
10-10-2024، دانا ئەحمەد مەجید، رێکخەرى گشتیی بزووتنەوەی گۆڕان لە پەیامێکی ڤیدیۆییدا کشانەوەی حیزبەکەی لە هەردوو حکومەتى هەرێمى کوردستان و حکومەتى خۆجێیی لە پارێزگاکانی سلێمانی و هەڵەبجە راگەیاند.
ئەمڕۆ یەکشەممە، 13ی تشرینی یەکەمی 2024، کەمال موسلیم، وەزیری بازرگانی و پیشەسازیی حکومەتى هەرێمى کوردستان کە لە پشکی گۆڕانە، بە تۆڕى میدیایی رووداوى راگەیاند: " دەستم لە کارکێشاوەتەوە، پابەندى بڕیارەکەى بزووتنەوەى گۆڕانم، بەڵام تاوەکو رێکارە کارگێرییەکان تەواو دەبن، دەوام دەکەم."
بەپێی زانیارییەکانی رووداو، هەردوو وەزیرەکەی دیکە، ئاوات شێخ جەناب، وەزیرى دارایی و ئابوورى و کوێستان محەممەد عەبدوڵڵا، وەزیرى کار و کاروبارى کۆمەڵایەتیی حکومەتى هەرێمى کوردستان، بەردەوام دەبن لە دەوامی خۆیان، تاوەکو رێکارە کارگێرییەکانی دەستلەکارکێشانەوەیان تەواو دەبێت.
دانا عەبدولکەریم، وەزیری ئاوەدانکردنەوە و نیشتەجێکردن، تاکە وەزیری بزووتنەوەکەیە، تاوەکو ئێستا ئامادە نییە لە پۆستەکەی بکشێتەوە. بەگوێرەی بەدواداچوونی رووداو، وەزیری ئاوەدانکردنەوە نزیکە لە کوڕانی نەوشیروان مستەفا و دانا ئەحمەد مەجید بە رێکخەری بزووتنەوەکە نازانێت.
جگە لەو سێ وەزیرەی دەستیان لەکارکێشاوەتەوە، زۆربەی بەڕێوەبەری فەرمانگەکانی سنووری پارێزگای سلێمانی، ئەوانەی لە پشکی گۆڕانن، بڕیاریانداوە لە حکومەتی خۆجێی پارێزگاکان بکشێنەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ