رووداو دیجیتاڵ
دوای مانگ و نیوێك لە بڕیاری لابردنی 50%ی رسوماتی گومرگیی هاوردەكردنی ئاژەڵ، هێشتا نرخی گۆشت هەرزان نەبووە. بەڕێوەبەری سامانی ئاژەڵ لە سلێمانی دەڵێت، "لەبەر ئەوەیە کە تاکە رێگە بۆ هاوردەكردنی ئاژەڵ بە ئاسانی، فڕۆكەخانەیە و رێگەی وشكانی گرفتی زۆرە."
لە 27ی ئاداری ئەم ساڵەوە، بڕیاری لابردنی 50%ی رسوماتی گومرگیی هاوردەكردنی ئاژەڵ جێبەجێ کراوە. جەمال حوسێن، بەڕێوەبەری سامانی ئاژەڵ لە سلێمانی بە تۆڕی میدیایی رووداوی راگەیاند، هێشتا نرخی گۆشت دانەبەزیوە.
جەمال حوسێن دەڵێت، "پێشتر لە توركیا و ئێرانەوە بە رێگەی وشكانی ئاژەڵێكی زۆر هاوردە دەكران، بەڵام ماوەیەكی زۆرە ئێران بە ترانزێت رێگە نادات و توركیاش بۆ هەر سەر ئاژەڵێك 150 تاوەكو 300 دۆلار بەپێی جۆری ئاژەڵەكە وەردەگرێت. بۆیە تەنیا رێگە بۆ هاوردەكردنی ئاژەڵ فڕۆكەخانەیە، ئەویش تێچووی زۆرە."
بەڕێوەبەری سامانی ئاژەڵ لە سلێمانی باسی لەوەش كرد، لەدوای بڕیاری كەمكردنەوەی رسوماتی گومرگی، مۆڵەتێكی زۆریان بۆ هاوردەكردنی ئاژەڵ داوە، بۆیە پێشبینی کرا كاریگەریی ئەو بڕیارەی ئەنجوومەنی وەزیران زیاتر دەربكەوێت و نرخی گۆشت دابەزێت. گوتیشی، "ئەگەر گرفتەكانی هاوردەكردنی كەمتر ببنەوە بە دڵنیاییەوە ئاژەڵێكی زۆر هاوردە دەكرێت و نرخی گۆشتیش دادەبەزێت."
لەپێناو دابەزینی نرخی گۆشت لە 27-03-2024دا ئەنجوومەنی وەزیرانی هەرێمی كوردستان بڕیاریدا بۆ هاوردەكردنی ئاژەڵ لێخۆشبوونی 50%ی رسوماتی گومرگی جێبەجێ بكات.
لە هەرێمی کوردستان نرخی گۆشت لەنێوان 16 تاوەكو 24 هەزار دینارە، ئەوەش بەپێی جۆری ئاژەڵەكە دەگۆڕێت.
پێویستیی گۆشتی سوور بۆ نێوخۆی هەرێمی کوردستان ساڵانە زیاتر لە 88 هەزار تۆنە.
.webp&w=3840&q=75)
