رووداو دیجیتاڵ
راوێژکاری ئاسایشی نیشتمانیی عێراق بەبۆنەی بردنەوەی خەڵاتی وێبی بۆ دۆکیومێنتاریی 'کۆرۆوای'، پیرۆزبایی لە تۆڕی میدیایی رووداو دەکات.
قاسم ئەعرەجی، راوێژکاری ئاسایشی نیشتمانیی عێراق، لە پەیامێکدا دەڵێت: "دڵخۆشین پیرۆزبایی لە تۆڕی میدیایی رووداو بکەین کە یەکێکە لە دامەزراوە میدیاییە عێراقییە بە کوالێتییەکان و خەڵاتی وێبی بەدەستهێنا لە فیلمە دیکیۆمێنتارییەکەی 'کۆرۆوای'."
دەشڵێت: "ئەم دانپێدانانە فەرمییە جێی شانازییە بۆ ئێمە، بەتایبەت کاتێک ئەو رکابەرایەتییە بەهێزەمان لەگەڵ لە دەزگا میدیاییە جیهانییەکانی وەکو CNN و Bloomberg لەبەرچاو بێت."
راوێژکاری ئاسایشی نەتەوەیی عێراق باسی خەڵاتەکە دەکات کە رووداو وەریگرتووە و دەڵێت: "خەڵاتەکانی وێبی پێوەرێکە بۆ ئەوانەیە لە ئینتەرنێت بەهێزن، ئەوانەی لە بواری گێڕانەوەی چیرۆکەکان و ئامرازەکانی دیجیتاڵی بەهێزن."
لە بەشێکی دیکەی پەیامەکەی ئەعرەجیدا هاتووە: "بردنەوەی ئەم خەڵاتە بەتەنیا تیشک ناخاتە سەر پابەندیی دامەزراوەی تۆڕی میدیایی رووداو بە بەرهەمهێنانی ناوەڕۆکێکی دەوڵەمەنەد بە رۆشنبیری و سەرنجراکێش، بەڵکو جەخت لە گرنگی گۆڕەپانی میدیایی جیهانی دەکاتەوە. ئێمە ئەو بردنەوە جۆرییە بەرز هەڵدەسەنگێنین."
لە کۆتاییدا، قاسم ئەعرەجی دەڵێت: "لەو کاتەی تیشک دەخەینە سەر ئەم دەستکەوتە، ئومێدمان لێیان ئەوەیە بەردەوام بن لە داهێنان لە کارکردن لەسەر چیرۆکە گرنگەکان بۆ جەماوەر لەسەر ئاستی جیهان."
ئەم ساڵ بەڵگەفیلمی کۆرۆوای-ی تۆڕی میدیایی رووداو لەنێو زیاتر لە 13 هەزار بەشداربوو بووە براوەی خەڵاتی وێبی.
بەڵگەفیلمەکەی تۆڕی میدیایی رووداو سەر بە بەشی گەشت و شێوەی ژیانە( Travel and Lifestyle). لەنێو هەزاران بەڵگەفیلمێکی ئەمریکی، نیوزیلاندی و جۆرجیایی بووە براوەی خەڵاتەکە.
بەڵگەفیلمی کۆرۆوای لە دارستانەکانی پاپوای رۆژئاوا لە ئیندۆنیزیا تۆمارکراوە و لەسەر خێڵێکی نێو دارستانەکەیە کە تاوەکو ساڵی حەفتاکانی سەدە رابردوو، نە کەس دەیزانی ئەو خێڵە هەن و نە ئەندامانی خێڵەکەش دەیانزانی جیهانێک لە دەرەوەی دارستانەکەیاندا هەیە.
خەڵاتی وێبی ساڵی 1996 دامەزراوە و ساڵانە لەلایەن ئەکادیمیای نێودەوڵەتی هونەر و زانستە دیجیتاڵییەکان (IADAS) پێشکەش دەکرێت، ئەمساڵ یادی 28 ساڵەی خەڵاتەکەیە.
خەڵاتەکان تایبەتن بە داهێنان و لێهاتوویی تەکنیکی لەسەر پلاتفۆڕمە جیاوازەکان لە تۆڕی ئینتەرنێتدا؛ بەشێوەیەک بە ئۆسکاری ئینتەرنێت ناوی دەهێندرێت.
دوو پرۆسە بۆ دابەشکردنی خەڵاتەکان هەیە، سەرەتا بەربژێرەکان لەلایەن IADAS هەڵدەبژێردرێن و دواتر براوەکان لەڕێگەی ژمارەیەک دادوەری جیهانییەوە دیاری دەکرێن. هەروەها بەشێکی دیاریکردنی براوەی خەڵاتەکە لە رێگەی دەنگدانی خەڵکەوە دیاری دەکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ