جووتیارانی عەرەب لە خورماتوو دەیانەوێ دەست بەسەر 180 دۆنم زەویی گوندەکانی کورد بگرن

بەپێی گوتەی دانیشتوانی گوندەکان، هەفتانە دوو بۆ سێ جار هێزێکی سەربازی عێراقی دەچنە سەر گوندەکان و داوای چۆڵکردنی زەوییەکان دەکەن. عەدنان حەمید، دانیشتووی گوندی تەپەسەوز دەڵێت: "هەر جارێک دوو ئۆتۆمبێلی عەرەب دێت، هێزێکی گەورە بەدوایدا دێت. ئێمە تاپۆمان هەیە، بەڵام کاری پێناکرێت، لە کاتێکدا ئەوان گرێبەستیان هەیە و هەموو شتێکیان بۆ دەکرێت." ناوبراو ئاماژەی بەوەشکرد، کە ئەمە چەندین جارە دێن و ئەوان رێگرییان لێدەکەن، بەڵام ئێستا بە زەبری هێز و سوپا دەیانەوێت سەنگەر لەسەر زەوییەکانیان دروست بکەن و رێگری لە جووتیارانی کورد بکەن.

جووتیارانی ناوچەکە نیگەرانن لەوەی کە دەستبەسەرداگرتنی ئەم 180 دۆنم زەوییە، رێگا خۆشدەکات بۆ دەستبەسەرداگرتنی 1800 دۆنم زەوی دیکە لە گوندەکانی تەپەسەوز، پارەپارە و ئەلبو سەباح. مەجید حەمید، یەکێکی دیکە لە جووتیارەکان، داوا لە سەرکردایەتی کورد دەکات بێن بە هانایانەوە، چونکە بە گوتەی ئەو، سوپا دەیەوێت سەنگەر لەسەر زەوییەکانیان دروست بکات، کە ئەوکات هیچ کارێکیان پێناکرێت و رێگەی هاتووچۆیان لێدەگیرێت.

مەندیل وەهاب، جووتیارێکی دیکە، ئاماژەی بەوەدا کە ئەم حەوت گرێبەستە کێشەیەکی زۆر گەورەی بۆ دروستکردوون. "رۆژانە هێزی بەرپەرچدانەوەی خێرا و پۆلیس و سوپا دەهێننە سەرمان و دەیانەوێت لەسەر زەوییەکانمان دەرمانبکەن. ئێمە هەرچییەک دەکەین ناتوانین لەم کێشەیە رزگارمان بێت."

هێزە ئەمنییەکان بە جووتیارانی ئەو سێ گوندەیان گوتووە، یان دەبێت بەڵێننامەی دەستبەرداربوونی ئەو زەوییانە واژۆ بکەن، یانیش دەستگیر دەکرێن. بەڵام جووتیارەکان سوورن لەسەر ئەوەی کە دەستبەرداری زەوی باوباپیرانیان نابن.

بارەگای مەڵبەندی حەمرینی یەکێتیی نیشتمانیی کوردستان رایگەیاندووە، ئەگەر گوشارەکان لەمە زیاتر بێت، ئەوا پشتی جووتیارانی کورد دەگرن. مەلا حەسەن، کارگێڕی مەڵبەندی حەمرینی یەکێتی، دەڵێت: "ئێمە هەموو لایەنەکانی خەبات رەچاودەکەین، خەبات لەسەر زەوی لەگەڵ جووتیارانی کورد دەکەین. ئەو حەوت پارچە زەوییە کە ئەوان داوای دەکەن، خاوەنەکانیان بێن و پەنجەمۆر بکەن و دەستبەرداری بن تا رادەستی عەرەبەکان بکرێت، بە هیچ شێوەیەک خەڵکەکەمان ئەمە قبوڵ ناکات و ئێمەش پاڵپشتیان دەکەین."

ئەم دۆخە ئاڵۆزە پێشهاتێکی نوێی گەرمبوونی کێشەکانی خاوەندارێتی زەوییە لە ناوچە جێناکۆکەکان، کە پێویستی بە چارەسەرێکی بنەڕەتی و گفتوگۆیەکی جیددی هەیە بۆ رێگریکردن لە زیادبوونی گرژییەکان.