کەمئاوی هەڕەشە لە گوندەکانی باڵەکایەتی دەکات؛ کانیاوەکان وشک دەبن

لە گوندی چۆمانی سمایل ئاغای سنووری باڵەکایەتی، لە کۆی سێ کانیاوی سەرەکی، دووانیان بەتەواوی وشک بوون و تەنها یەک کانیاو ماوە، ئەویش بەشی پێداویستیی دانیشتووانی گوندەکە ناکات بۆ ئاوی خواردنەوە.

فەرحان ئاغا قادر، یەکێک لە دانیشتووانی گوندەکە بە نیگەرانییەوە دەڵێت: "ئەو کانیاوەی دەیبینن یەکەم جارە لە تەمەنی خۆم ببینم وشک بێت. پار ئەو کانیاوە جۆگەیەک ئاوی لەبەر دەڕۆیشت و کشتوکاڵی لەبەر دەکرا. زۆر لە خەمی ئەوەین کە ئەم ساڵ باخەکانیشمان پێ ئاو بدرێن، هیچ ئاو نەماوە و ئەگەر حکومەت ئێستا بەهانامانەوە نەیەت، دۆخی گوندەکەمان زۆر خراپ دەبێت."

بەپێی زانیارییەکان، پار ئەو کانیاوە ئاوی بۆ 30 ماڵی گوندەکە دابین دەکرد و زەوییەکی پان و بەرینی کشتوکاڵیشی پێ ئاودەدرا، بەڵام ئەم ساڵ "قەترەیەک ئاوی لەبەر ناڕوات"

زەوییە پڕ پیت و بەرهەمەکانی نێو گوند ئامادەکراون بۆ چاندن، بەڵام نەمانی ئاو، جووتیارانی دەستەوەستان کردووە. ئەو درەخت و دارانەی ساڵانێکە خزمەت دەکرێن، ئەم ساڵ لەبەر بێ ئاوی لەژێر هەڕەشەی وشکبووندان.

کەمبوونەوەی بەرچاوی بەفر و باران، جوانی و هاژەی تاڤگە وەرزییەکانی سنوورەکەشی نەهێشتووە. لەو سنوورە، دانیشتوانی 116 گوند، کەم ئاوی بووەتە خەمی لەپێشینەیان.

بەختیار ئازاد، بەڕێوەبەری ئاوی دەوروبەری سۆران دەڵێت: "لیژنەیەکمان پێکهێناوە بۆ ئەو سەرچاوە ئاوی و کانیاوانەی وشک دەبن. ئەگەر بەو دۆخەی ئێستا وا بڕوات، روونە لامان دەبێت 60٪ـی گوندەکان بە تانکەر ئاویان بۆ دابین بکەین. تانکەرمان ئامادەیە و هەر گوند و ناحیەیەک تووشی کەم ئاوی بوو، موختاری گوند داواکاری لە رێگەی ناحیە و قایمقامیەتەوە بەرزدەکاتەوە و دەیهێنێتە لامان، ئێمەش بەزوویی تانکەری ئاویان بۆ دابین دەکەین."

بەپێی ئامارەکان، بڕی بارانبارین لە ئەمساڵدا لە سنووری چۆمان گەیشتووەتە 310 ملیم، لەکاتێکدا پار تاوەکو ئەم کاتە، 1579 ملیم باران باریبوو. ئەو چیا و بەرزاییانەش کە تاوەکو کۆتایی وەرزی بەهار بەفر بە سپێتی دەیهێشتنەوە، ئەمساڵ کە تازە سەرەتای بەهارە، کەم بەفریان بەسەرەوە ماوە.

چاودێرانی ژینگەیی هۆشداری دەدەن ئەگەر بەپەلە چارەسەرێک بۆ ئەم دۆخە نەدۆزرێتەوە، هاوینێکی زۆر سەخت و قەیراناوی چاوەڕوانی ناوچەکە دەکات.