رووداو دیجیتاڵ
لە شاری عەفرینی رۆژئاوای کوردستان کە ئێستا لە کۆنترۆڵی گرووپە چەکدارەکانی ئۆپۆزیسیۆنی سووریا و هێزەکانی تورکیادایە، نوێنەرانی ئەنجوومەنی نیشتیمانی کورد - ئەنەکەسە لەنێو سەرکردایەتیی ئیتیلافی ئۆپۆزیسیۆنی سووریا، لەگەڵ ژمارەیەک خەڵکی ناوچەکە کۆبوونەوە و بارۆدۆخی عەفرین و کێشەکانی خەڵکی ناوچەکەیان تاوتوێ کرد.
رۆژی دووشەممە، 12ی شوباتی 2024، عەبدوڵڵا گەدۆ و زوهێر محەممەد ئەندامانی دەستەی سیاسیی ئەنجوومەنی نیشتیمانی کورد لە سووریا (ئەنەکەسە)، کە هاوکات ئەندامی دەستەی سیاسیی ئیتیلافی ئۆپۆزیسیۆنی سووریا و نوێنەری ئەو ئەنجوومەنەن لە نێو سەرکردایەتی ئیتیلافی ئۆپۆزیسیۆنی سووریا، سەردانی شاری عەفرینیان کرد و لەگەڵ ژمارەیەک خەڵکی ناوچەکە کۆبوونەوە.
سەردانی ئەو دوو بەرپرسەی ئەنەکەسە بۆ عەفرین و کۆبوونەوەیان لەگەڵ خەڵک، لەسەر داوا و بانگهێشتی رێکخستنەکانی خۆجێی پارتی دیموکراتی کوردستان-سووریا (پەدەکەسە) و ئەنەکەسە لە هەرێمی عەفرینی رۆژئاوای کوردستان بووە.
عەبدوڵڵا گەدۆ، ئەندامی دەستەی سیاسیی ئەنەکەسە و نوێنەری ئەو ئەنجوومەنە لە نێو سەرکردایەتی ئیتیلافی ئۆپۆزیسیۆنی سووریا لەبارەی کۆبوونەوەکەی عەفرین بە رووداوی رایگەیاند، نزیکەی 100 کەس لە کۆبوونەوەکەی ئەمڕۆی عەفریندا ئامادە بوون، هەروەها ژمارەیەک بەرپرس و نوێنەرانی رێکخستنە خۆجێیەکانی پەدەکەسە و ئەنەکەش بەشداریان لە کۆبوونەوەکەدا کردبوو.
عەبدوڵڵا گەدۆ هەروەها گوتی، لە کۆبوونەوەکەدا، بارۆدۆخی هەرێمی عەفرین، كێشەکانی خەڵکی رەسەنی ناوچەکە، هەروەها پرسەکانی پەیوەندیدار بە دۆخی هاونیشتمانیان بە گشتی تاوتوێ کران.
هەرێمی عەفرینی رۆژئاوای کوردستان لە 18ی ئازاری 2018ـەوە لەژێر دەسەڵاتی سوپای تورکیا و گرووپە چەکدارەکانی ئۆپۆزیسیۆنی سووریادایە.
ساڵی 2018، سوپای تورکیا و هێزە چەکدارەکانی نزیک لەم وڵاتە هێرشیانکردە سەر هەرێمی عەفرین، کە ئەوکات لە ژێر دەسەڵاتی بەڕێوەبەرایەتیی خۆسەردا بوو و دوای شەڕێکی دوو مانگە، داگیریان کرد.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ