رووداو دیجیتاڵ
بەڕێوەبەری کانی زێڕی زڕەشۆرانی پارێزگای ورمێ دەڵێت، لە 7 مانگدا زیاتر لە 800 کیلۆگرام زێڕیان هەبووە؛ ئاماژە بەوەش دەکات، بەرهەمهێنانیان بەراورد بە هەمان کاتی پار زیادی کردووە.
ئەمڕۆ دووشەممە، 10-11-2025، جەعفەر سادق ئەسکەندەری، بەڕێوەبەری کانی زێڕی زڕەشۆرانی سنووری شاری تیکابی سەر بە پارێزگای ورمێی رۆژهەڵاتی کوردستان رایگەیاند، کانەکە بە بەرهەمهێنانی 110 کیلۆگرام زێڕ لە یەک مانگدا (21-09-2025-21-10-2025) پلەی یەکەمی لەسەر ئاستی ئێران بەدەستهێناوە.
جەعفەر سادق ئەسکەندەری ئاماری بەرهەمهێنانی کانی زێڕی زڕەشۆرانی لە 21-03-2025 تاوەکو 21-09-2025ـیش خستەڕوو و گوتی، 692 کیلۆگرام زێڕی بەرهەم هێناوە.
وەک بەڕێوەبەری کانی زێڕی زڕەشۆران ئاماژەی دا، بەراورد بە هەمان کاتی پار، بەرهەمهێنانی زێڕیان 31٪ زیادکردووە.
کانی زێڕی زڕەشۆران گەورەترین کانی زێڕی رۆژهەڵاتی کوردستان و ئێرانە کە 35 کیلۆمەتر لە شاری تیکابی پارێزگای ورمێوە دوورە و ساڵانە نزیکەی 1.5 تۆن زێڕی لێ بەرهەم دێت.
پارێزگای ورمێ زیاترین یەدەگی زێڕی هەموو ئێرانی لێیە و خاوەنی 31٪ی یەدەگی زێڕی وڵاتەکەیە؛ نزیکەی 35٪ی زێڕی ئێران لەو پارێزگایەدا بەرهەم دێت.
