رووداو دیجیتاڵ
لە داقووق، عەرەبی هاوردە دەیەوێت جارێکی دیکە دەست بەسەر ئەو 50 هەزار دۆنم زەوییەی کورد بگرێتەوە، کە حزبی بەعسی هەڵوەشاوە بە دیاری پێیدابوون.
پورە حەلاو تەمەنی 60 ساڵە و هاوژینەکەی شەهیدی سەنگەرە، عەرەبی هاوردە دەستیان بەسەر بەشێک لە زەوییەکەیدا گرتووە، حەوت ساڵە هەرەسانی دەستی عەرەبی هاوردەن.
حەلاو بەکر دانیشتووی گوندی یەنگیجە و دەڵێت: "خەڵکی رایدەکرد و ئێمە گوتمان ناڕۆین و ئەم خاکە بۆ عەرەب جێناهێڵین. هەموو جارێک ئەو عەرەبانە بە ئۆتۆمبێل و چەکەوە هێرش دەکەنە سەرمان، ئێمەش لە بڵندگۆی مزگەوتەکەوە بانگەواز دەکەین و خەڵکی رێگریان لێدەکەن، ناچار هەڵدێن و دوای ماوەیەک و بەتایبەتی لە وەرزی دروێنە جارێکی دیکە دێنەوە سەرمان."
هەوڵی زۆری هاوردەکان بۆ دەستبەسەرداگرتنی زەوی گوندی یەنگیجەی سنووری داقووقە.
عزەدین تاڵەبانی، سەرۆکهۆزی تاڵەبانیەکانی کەرکووکە، خاوەن چەندین بەڵگە، نوسراو و تاپۆیە کە خاوەندارێتیی زەوییەکانیان دەیسەڵمێنێت.
عزەدین تاڵەبانی دەڵێت: "لەدوای ساڵەکانی 1974 و 1975 بڕیارەکانی سەرکردایەتیی ئەنجوومەنی شۆڕش دەرکراوە کە بریتییە لە بڕیارەکانی(824)، (369) و (949) ئەمانە زیاتر لە 300 هەزار دۆنم زەویی کوردی تەعریب کرد بۆ هێنانی هۆزە عەرەبییەکان لە پارێزگاکانی باشوور و نێوەڕاستی عێراق بۆ ناوچەکە."
پەرلەمانی عێراق دەیەوێت بە پڕۆژە یاسایە، پرسی زەوییە کێشە لەسەرەکان چارەسەر بکات و دوو خوێندنەوە بۆ کراوە و چاوەڕێی پەسند کردنە.
دارا سێکانیانی، ئەندامی ئەنجوومەنی نوێنەرانی عێراق دەڵێت: "ئەو کێشانەی کە رۆژانە یان ساڵانە روودەدەن، بە تایبەتی لە وەرزەکانی چاندن و دروێنەدا، پێویستیان بە چارەسەرێکی خێرا هەیە، بۆیە زۆرجار دەبێت لە رێگەی سەرۆکی ئەنجوومەنی وەزیرانەوە بەشێوەیەکی کاتی رابگیرێن و ئەمەش وادەکات دووبارە ببنەوە."
جووتیارانی کورد دەیانەوێت لە رێگەی دادگای فیدراڵیەوە کێشەی زەوییەکانیان چارەسەر بکەن، بەڵام دادگەی فیدراڵی 10 جار دانیشتنی ئەنجامداوە و نەیتوانیوە سکاڵای 10 هاونیشتمانیی کورد یەکلایی بکاتەوە.
48 ساڵ لەمەوبەر، بە بڕیارێک سەدان دۆنم زەویی جووتیارانی کورد لەدەستیان دەرهێنرا و بەشێکیان وەکو دیاری بەخشرایە عەرەبی هاوردە و بەشێکی دیکەشی خرایە سەر وەزارەتەکانی عێراق. بیست ساڵ زیاتریشە هەوڵدەدرێت ئەو بڕیارە هەوڵبوەشێندرێتەوە و تائێستا سوودی نەبووە، هەڵوەشاندنەوەی ئەو بڕیارە رزگارکردنی جووتیارانی کوردە لەدەستی ئەو کێشانەی هەموو ساڵێک لە وەرزی دروێنە دووچاری دەبنەوە.
.jpg&w=3840&q=75)
