لە پڕۆژەی رووناکی ئەمپێرێک کارەبا بە چەندە؟

لەگەڵ بڵاوبوونەوەی نرخی جیای کارەبای (پڕۆژەی رووناکی) بەتایبەت کە دەگوترێت بە ئەمپێرە، ئەمڕۆ یەکشەممە تیمەکە بە تۆڕی میدیایی رووداوی گوت: "هەموو دەنگۆیەک رەتدەکەینەوە کە کارەبای 24 کاژێری بەگوێرەی ئەمپێر بێت؛ چونکە سیستمەکە کیلۆواتە و هیچ پەیوەندی بە ئەمپێرەوە نییە".

لەبەرئەوەی زۆرینەی هاونیشتمانییان بۆ بەکارهێنانی کارەبا زیاتر شارەزای ئەمپێرن، ئەندازیاران و بەرپرسانی کارەبا جیاوازییەکانی ئەمپێر و کیلۆوات روون دەکەنەوە.

یەک کیلۆوات هەزار واتە، هەر یەک ئەمپێریش 220 واتە. هەرچەندە نرخی کیلۆواتی کارەبای (پڕۆژەی رووناکی) بە فەرمی دیارینەکراوە و بەرپرسانی پڕۆژەکە دەڵێن، بەگوێرەی پلەبەندییە و 400 کیلۆواتی یەکەم نرخێک دەبێت و 400ـی دووەم زیاتر و هەر 400ێک زیاتر نرخەکە زیاتر بەرز دەبێتەوە.

بەگوێرەی تیمەکە، بەکارهێنانی کارەبا بۆ 400 کیلۆواتی نرخەکەی کەمترە و خێزانی کەم دەرامەت و ئەوانەی ئامێری کارەباییان کەمە دەتوانن لێی سوودمەند بن، ئەگەر بەکارهێنان بگاتە 800 کیلۆوات، نرخی 400 کیلۆواتی دووەم زیاتر دەبێت؛ ئەگەر 400 کیلۆواتی زیاتر بەکارهات و گەیشتە هەزار و 200 کیلۆوات، نرخی 400 کیلۆواتی سێیەم زیاتر دەبێت، بەڵام دەشڵێن: "ئەوەش هێشتا ئەزموونییە و بڕیاری کۆتایی لەسەر نەدراوە".

بەرپرسێکی باڵای کارەبا بە رووداوی گوت: "پێشنیاز کراوە نرخی 400 کیلۆواتی سەرەتا هەر کیلۆواتێکی 80 دینار بێت؛ 400ـی دووەم 100 دینار و 400ـی سێیەم بەرزبێتەوە بۆ 200 دینار بۆ یەک کیلۆوات، ئەوەش بە ئامانجی ئەوەی خەڵک کەمترین بڕی کارەبا بەکاربهێنن و زیاتر نەبێ لە 800 کیلۆوات."

یەک ئەمپێر واتا 220 وات لە کاژێرێکدا، ئەگەر 24 کاژێر بەردەوام یەک ئەمپێر بەکاربهێندرێت دەبێتە 5 کیلۆوات و 280 وات، ئەگەر بە تەواوی مانگەکە یەک ئەمپێر بە بەردەوامی بەکاربهێندرێت، مانگانە دەبێتە و 158 کیلۆوات و 40 وات. ئەگەر نرخی یەک کیلۆوات 80 دینار بێت وەکو پێشبینی دەکرێت لە 400 کیلۆواتی سەرەتا نرخەکەی وابێت، واتا یەک ئەمپێر مانگێک تێچووەکەی دەبێتە 12 هەزار و 750 دینار، ئەگەر سێ ئەمپێر و نیو بەکاربهێنێت تێکڕا لە 400 کیلۆواتی یەکەم، ئەوە کۆی مانگەکە 44 هەزار و 500 دیناری بۆ دێتەوە.

ئەگەر هاونیشتمانییەک لە سەرەتای یان نێوەڕاستی مانگەکەدا 400 کیلۆوات زیاتری بەکارهێنا و کەوتە نێو بەکارهێنانی 400 کیلۆواتی دووەمەوە، ئەوکاتە نرخی هەر کیلۆواتێک لەسەری بە 100 دینار هەژمار دەکرێت. لەم کاتەدا تێچووی یەک ئەمپێر لەسەری دەبێتە 15 هەزار و 840 دینار و سێ ئەمپێر دەبێتە 47 هەزار و 500 دینار.

لە ئەگەری زیاتر بەکارهێنان و چوونە نێو بڕی سێیەمی 400 کیلۆواتی پێشنیازکراوەوە کە دەگوترێت یەک کیلۆواتی 200 دینار دەبێت، ئەوە تێچووی ئەمپێرێکی مانگانە دەبێتە 31 هەزار و 680 دینار. واتا سێ ئەمپێری مانگانە دەبێتە 95 هەزار و 40 دینار.

نرخەکان جێگیر نەکراوە، تیمەکە دەڵێن، دەبێت نرخەکان لە ئەنجوومەنی وەزیران پەسند بکرێت، پاشان نرخی فەرمی بڵاو دەکەنەوە.