رووداو دیجیتاڵ
سەرۆککۆماری ئێران سەبارەت بە رووخانی دەسەڵاتی بەشار ئەسەد و دوایین پێشهاتەکانی سووریا رایگەیاند، "پێویستە لەنێوان پێکهاتە جیاوازەکانی کۆمەڵگەی سووریا بۆ گەیشتن بە لێکتێگەیشتن گفتوگۆ هەبێت و گەلی سووریا بتوانێت دوور لە دەستوەردانی دەرەکی بڕیار لە داهاتووی سووریا و سیستمە سیاسییەکەی بدەن."
بەپێی راگەیێندراوی نووسینگەی سەرۆکایەتیی کۆماری ئێران، مەسعود پزیشکیان ئەمڕۆ لە کۆبوونەوەی کابینەی حکومەتەکەی باسی دۆخی سووریای کردووە و جەختی لە پێویستیی پاراستنی یەکگرتوویی، سەروەری و یەکپارچەیی خاکی سووریا کردووەتەوە و روونیکردووە کە "پێویستە گەلی سووریایە خۆی بڕیار لەسەر داهاتووی ئەو وڵاتە و سیستمی سیاسی و حکومەتەکەی بدات."
پزیشکیان ئاماژە بە پێویستیی گفتوگۆ لە نێوان پێکهاتە جیاوازەکانی کۆمەڵگەی سووریا دەکات بۆ گەیشتن بە لێکتێگەیشتن و هیوای خۆی دەربڕیوە کە "ململانێ و پێکدادانە سەربازی و توندوتیژییەکان بەزووترین کات کۆتاییان پێبێت بۆ ئەوەی گەلی سووریا بتوانێت لە ژینگەیەکی ئارامدا دوور لە هەر جۆرە توندوتیژییەک و نیگەرانی یان دەستوەردانی وێرانکەری دەرەکی بۆ دیاریکردنی چارەنووسیان، بڕیارێک بدەن کە شایەنی گەلی گەورەی سووریا بێت."
نووسینگەی سەرۆککۆماری ئێران هەروەها دەڵێت، پزیشکیان جەختی لە گرنگیی دەستەبەرکردنی ئاسایشی سەرجەم هاووڵاتیان و دانیشتووانی سووریا، پاراستنی شوێنە پیرۆزەکان، هەروەها شوێن و نوێنەرایەتییە دیپلۆماسی و کۆنسوڵخانەکان بەپێی یاسا نێودەوڵەتییەکان کردووە و رایگەیاندووە، "ئێران درێژە بە راوێژکارییە دیپلۆماسییەکانی دەدات لەگەڵ لایەنە پەیوەندیدارەکان و نەتەوە یەکگرتووەکان بە مەبەستی سەقامگیرکردنی دۆخەکە و پاراستنی سەقامگیری و ئاسایشی ناوچەکە."
لە راگەیێندراوەکەدا هاتووە، "سەرۆککۆمار بە تووندی کردەوەکانی رژێمی زایۆنی لە هێرشکردنە سەر خاکی سووریا سەرکۆنە دەکات و داوا دەکات، هەموو لایەنە ناوخۆییەکانی ئەو وڵاتە، هەروەها وڵاتانی ناوچەکە لە بەرامبەر خراپ بەکارهێنانی دۆخەکە لە لایەن رژێمی زایۆنییەوە بۆ پێشخستنی تەماحە فراوانخوازانە و نایاساییەکانی لە بەرامبەر گەلانی ناوچەکە وریاتر بن."
دوای 53 دەسەڵاتی بنەماڵەی ئەسەد، بەرەبەیانی رۆژی یەکشەممە، 8-12-2024 هێزەکانی دەستەی تەحریری شام گەیشتنە دیمەشق و کۆتاییان بە دەسەڵاتی بەشار ئەسەد و بنەماڵەکەی لە سووریا هێنا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ