رووداو دیجیتاڵ
سەرۆکی یەکێتیی نیشتمانیی کوردستان لە دیداری مێریدا دیدگەی خۆی بۆ ژمارەیەک پرسی نێوخۆی هەرێمی کوردستان، عێراق و سووریا و ناوچەکە خستەڕوو.
پەیمانگای توێژینەوەی رۆژهەڵاتی نێوەڕاست (مێری) رۆژی سێشەممە دیداری ساڵانەی خۆی بۆ دوو رۆژ لە هەولێر بە سپۆنسەری میدیایی تۆڕی میدیایی رووداو دەستپێکرد، تێیدا سیاسەتڤانانی نێودەوڵەتی، بەرپرسە هەرێمییەکان و ئەکادیمییەکان گفتوگۆ لەبارەی پێشهاتە سیاسی و ئەمنییە گرنگەکانی سەرانسەری رۆژهەڵاتی نێوەڕاست دەکەن.
سەقامگیریی نێوخۆیی و ئەجێندای چاکسازیی یەکێتی
لە وەڵامی پرسیارێکدا سەبارەت بە دابەشبوون کە جاری وا هەبووە ئاستەنگی بۆ یەکێتی دروستکردووە، بافڵ تاڵەبانی، سەرۆکی یەکێتیی نیشتمانیی کوردستان بیرۆکەی دابەشبوونی نێو پارتەکەی رەتکردەوە و گوتی، "هیچ دابەشبوونێکی نێوخۆیی لە یەکێتیدا نییە. یەکێتی ئێستا لە هەموو کاتێک یەکگرتووترە. دەنگەکانمان لەدوای هاتنی سەرکردایەتیی نوێوە بەشێوەیەکی بەرچاو زیادیان کردووە."
سەرۆکی یەکێتی ناسەقامگیریی رابردووی بۆ قۆناخی گواستنەوە گەڕاندەوە دوای نەخۆشکەوتن و کۆچی دوایی جەلال تاڵەبانی. سەرەڕای ئەو ئاڵنگارییانە، بافڵ تاڵەبانی گوتی، پشتیوانیی جەماوەریی پارتەکە وایکردووە بتوانێت خۆی بگرێتەوە.
بە گوتەی بافڵ تاڵەبانی، ئەنجامی هەڵبژاردنەکانی ئەم دواییە زیندوویی پارتەکە نیشان دەدات، بەڵام "تاوەکو یەکێتی نەبێتەوە پارتی ژمارە یەک لە رۆژهەڵاتی نێوەڕاست، من دڵخۆش نابم."
"سلێمانی بۆ بازرگانی کراوەیە"
بافڵ تاڵەبانی باسی بەڕێوەبردنی سنووری سلێمانی کرد و سلێمانی وەک نموونەی حوکمڕانیی شەفاف و متمانەی وەبەرهێنەر نیشاندا، سەرەڕای ئاڵنگارییە ئابوورییە بەرفراوانەکان.
سەرۆکی یەکێتی باسی لەوە کرد، سەرەڕای ئەوەی قەیرانێکی دارایی هەیە، بەڵام "براکەم [قوباد تاڵەبانی] و تیمەکەی لە سێ ساڵدا" توانیویانە کار و پڕۆژەی زۆر باش و گەورە بۆ سنووری سلێمانی بکەن.
"سلێمانی بۆ بازرگانی کراوەیە. هیچ کەسێک لە شانت نادات و داوای 50%ی پرۆژەکەت بکات،" ئەوە گوتەی سەرۆکی یەکێتی بوو و ئاماژەی بەوەشکرد، شەفافیەت، چاکسازی و دادپەروەری بناخەی فەلسەفەی وەبەرهێنانی پارتەکەن.
لاهور شێخ جەنگی و سەروەریی یاسا
نیگەرانی لەبارەی دەستگیرکردنی کەسایەتییە ئۆپۆزیسیۆنەکان لە سلێمانی باس کرا، لەنێویاندا لاهوور شێخ جەنگی، ئامۆزا و هاوسەرۆکی پێشووی یەکێتی.
بافڵ تاڵەبانی گوتی، "هەبوونی پارتی سیاسی بە مانای هەبوونی قەڵخان نایەت. بەڵگەکان دژی لاهوور و گرووپەکە زۆرن؛ تەلەفۆن، هارد درایڤ، درۆن، چەک، ناسنامە. بوون بە سەرکردەیەکی سیاسی ناتخاتە سەرووی یاساوە."
سەرۆکی یەکێتی گوتی، کراوەیی سلێمانی بۆ ناڕەزایەتی لە ناوچەکەدا وێنەی نییە و رایگەیاند، "نزیکەی هەموو چالاکڤانێکی سیاسی لە کوردستان و زۆرێک لە عێراق، لە سلێمانی سەلامەتن." بەڵام، سوور بوو لەسەر ئەوەی "تاوانکاری و گەندەڵی"، تەنانەت لەژێر پەردەی سیاسیشدا، رووبەڕووی لێپرسینەوەی دادوەری دەبێتەوە.
هاوبەشی لەگەڵ پارتی دیموکراتی کوردستان
لە کاتی باسکردنی دواکەوتنی پێکهێنانی کابینەی نوێی هەرێمی کوردستان، بافڵ تاڵەبانی تیشکی خستە سەر حکومەتێکی هاوپەیمانیی "گشتگیر و کارا."
گوتیشی، "هیچ پارتێک بە شێوەیەکی یەکلاییکەرەوە هەڵبژاردنی پەرلەمانی کوردستانی نەبردەوە. ئەمە واتای ئەوەیە کە دەبێت هاوپەیمانیمان هەبێت. پرسیارەکە ئەوەیە: چاودێرتان دەوێ یان هاوبەش؟ ئەگەر هاوبەشتان دەوێ، هاوبەشیمان لەگەڵ بکەن."
سەرۆکی یەکێتی جەختی لە هاوبەشیی مێژوویی نێوان یەکێتی و پارتی کردەوە کە پێکەوە دەستکەوتی گەورەیان مسۆگەر کردووە، لە تێکشکاندنی داعش و قاعیدەوە بیگرە تاوەکو نووسینەوەی دەستووری عێراق.
پەیوەندییەکانی بەغدا و رێککەوتن
سەبارەت بە پەیوەندییەکانی بەغدا – هەولێر، بافڵ تاڵەبانی ئاماژەی بەوە کرد، دەبێت رێککەوتنەکان کۆنکرێتی بن و گوتی، "با واز لە واژۆکردنی ئەو بەڵگەنامانە بهێنین کە دەزانین سەرکەوتوو نابن. با گفتوگۆی راستەقینەمان هەبێ و لەسەر ئەو شتانە رێکبکەوین کە بەڕاستی دەتوانین بیکەین."
سەرۆکی یەکێتیی نیشتمانیی کوردستان بە بایەخەوە باسی لە کەشی ئەم دواییەی نێوان هەرێمی کوردستان و عێراق کرد و گوتی، دەستپێکردنەوەی ئەم دواییەی هەناردەی نەوت و پێدانی مووچە "کەشێکی باشی" دروست کردووە کە دەبێت بۆ هاوکاریی زیاتر سوودی لێ وەربگیرێت.
سووریا و مافی کورد
سەبارەت بە سووریا، بافڵ تاڵەبانی پێشوازی لە کەمکردنەوەی گرژییەکانی حەلەب کرد و ستایشی هەوڵەکانی تۆم باراک، نێردەی ئەمریکا؛ مەزڵووم عەبدی، فەرماندەی گشتیی هەسەدە و نێوەندگیرە فەرەنسییەکان کرد.
بافڵ تاڵەبانی جەختی لە پێویستیی گفتوگۆی گونجاوی نێوان دیمەشق و هێزەکانی سووریای دیموکرات (هەسەدە) کردەوە.
کاتێک پرسیاری لێکرا کە پێی وایە پەیوەندییەکانی نێوان هەسەدە و دیمەشق بەرەو کوێ دەچن، بافڵ تاڵەبانی گوتی، "پێم وایە ئەگەر چاوەڕوانییەکانی دیمەشق لە هێزەکانی سووریای دیموکرات واقیعی بن، هەروەها ئەگەر دیمەشق بتوانێ خۆی بگرێ، گەشبینم بەوەی پێکەوە کاربکەن. ئەگەر داواکاری نابەجێ هەبن، ئەوا پێم وا نییە هەسەدە جێبەجێیان بکات، هەروەها هانیشیان نادەم بۆ ئەوەی ئەو کارە بکەن."
لە وەڵامی ئەو پرسیارەی کە داواکارییە گونجاوەکان چین؟ سەرۆکی یەکێتی گوتی، "داواکارییە گونجاوەکان بریتیین لەوەی ناوچە کوردنشینەکان جۆرێک لە خۆبەڕێوەبەرییان هەبێ، ئیدی ئەگەر لە ئاستی پارێزگا بێ یان شتێکی هاوشێوە؛ یان دان بە زمانەکەدا بنرێ؛ دان بە کولتووردا بنرێ و بپارێزرێ. هەروەها جۆرێک لە دامەزراوەی ئاسایش هەبێ کە بمانپارێزێ و بەلامانەوە پەسند بێ وەک کورد، و هەروەها تێکەڵمان بکات بە جۆرێک لە جۆرەکان لەگەڵ دامەزراوە هەواڵگری و سەربازییەکان. ئەمانە داواکاری گونجاون."
بافڵ تاڵەبانی داکۆکی لە پرۆژەیەکی نیشتمانیی سووریایی کرد و مۆدێلی فیدراڵیی عێراقی بە گونجاندنی پێویستەوە بە نەخشەڕێگەیەکی گونجاو بۆ سووریا ناوبرد و گوتی، "سووریا وەک عێراق هەمەچەشنە. مۆدێلی عێراقی، بە کەمێک دەستکارییەوە، تاکە رێگەی راستەقینەی پێشەوەیە."
سەرۆکی یەکێتی یگوتی: "ئێمە هیچ بەرژەوەندییەکمان لە سووریادا نییە جگە لە مسۆگەرکردنی مافەکانی گەلی سووریا" و ئاماژەی بە دۆستایەتیی خۆی لەگەڵ مەزڵووم عەبدی کرد.
بافڵ تاڵەبانی داوای لە هێزە کوردییەکان کرد بە شێوەیەکی چالاکانە لەگەڵ دیمەشق کاربکەن و هۆشداری لە گۆشەگیریی سیاسی دا و گوتی: "شەمەندەفەرێک هەیە و دەجووڵێ. رێڕەوەکان رەنگە پتەو نەبن، بەڵام شەمەندەفەرەکە دەجووڵێ. پێویستە ئێمە لەسەر ئەو شەمەندەفەرە بین."
پرۆسەی چارەسەری و دۆخی ئێران
بافڵ تاڵەبانی سەبارەت بە پرۆسەی چارەسەری ئێستای تورکیاش گەشبین بوو.
سەرۆکی یەکێتیی نیشتمانیی کوردستان گوتی، بڕیارەکەی عەبدوڵڵا ئۆجەلان بۆ چەکدانان "بە بناخەی هەوڵەکانی ئاشتی دەمێنێتەوە" و پشتیوانیی یەکێتی بۆ چارەسەرێکی ئاشتییانە دووپاتکردەوە کە مافەکانی کورد و سەقامگیریی هەرێمی هاوسەنگ بکات.
سەبارەت بە رۆڵی ئێران لە عێراق و ناوچەکەدا، بافڵ تاڵەبانی رەتیکردەوە تاران لاواز بووبێ و گوتی: "بەڵێ، حیزبوڵڵا و حەماس لاوازبوون، بەڵام ئەمە واتای ئەوە نییە ئێران لاواز بووە؛ دامەزراوەکانیان، هەرچەندە سروشتی ئایینییان هەیە، سەلماندوویانە کە لەژێر گوشاری زۆردا خۆڕاگرن."
سەرۆکی یەکێتی ئاماژەی بە "خۆگرتنەوەی خێرای ئێران" دوای پاشەکشە سەربازییەکانی ئەم دواییە کرد وەک بەڵگەی "مانەوەی دامەزراوەیی و یەکڕیزیی نیشتمانی."
