لە هەولێر کەسێک مۆخی خۆی بە برایەکی دەبەخشێت

کەریمخان شێرکۆ، کتێبفرۆشێکی شاری هەولێرە، براکەی تووشی شێرپەنجەی خوێن بووە و پێوستی بە گۆڕینی مۆخی ئێسکە. کەریم شێرکۆ بە رووداوی گوت: "دوای ئەوەی دکتۆر پێیڕاگەیاندین دەبێ خوشک و براکانی مۆخ بە براکەم ببەخشن، من دەستپێشخەریم کرد."

بە گوتەی خۆی، کەریمخان نەخۆشیی پەستانی خوێن و گورچیلەی هەیە، بەڵام ئەوە نەبووەتە رێگر و دەڵێت: "سڵ لە کاری مرۆیی ناکەمەوە."

کەریمخان شێرکۆ لەبارەی کاتی چاندنی مۆخەوە گوتی: "رۆژی یەکشەممە سەرەتا دەرزی بەرگریمان لێدەدەن و دواتر کەرەنتینە دەکرێین. دوای پێنج رۆژ کە بەرگریمان بەرزبووەوە، مۆخەکەی پێشکێش دەکەم. دواتر پێویستە دووبارە من کەرەنتین بکرێمەوە، چونکە بەرگریی لەشم دادەبەزێت و پێویستە لە خەڵک دوور بم. رۆژی چوارشەممەیش مۆخ بۆ دیاریی برام دەچێندرێت."

کەریمخان شێرکۆ گوتی: "دکتۆرەکان دەڵێن پێویستە ماوەیەک رۆژانە و دواتر هەفتانە، پاشانیش ساڵانە بچمە تاقیگە و پشکنین بۆ خۆم بکەم و ئاگاداری بەرگریی لەشم بم".

کەریمخان شێرکۆ و دیاریی برای، لە نەخۆشخانەی هیوای شاری سلێمانی کەرەنتین کراون و چاوەڕوان دەکرێت هەفتەی داهاتوو چاندنی مۆخ و گواستنەوەکەیان بۆ بکرێت. کەریمخان تەمەنی 35 ساڵە، خێزاندارە و کچێک و کوڕێکی هەیە. دیاریش تەمەنی 30 ساڵە و خێزاندارە؛ سێ کوڕی هەیە.