لە هەولێر سێ ئەندامی خێزانێک بە چەقۆ کوژران

بەهرۆز فەرەیدوون، پەیامنێری رووداو لە هەولێر رایگەیاند رووداوەکە لە گەڕەکی مامزاوە لە هەولێر روویداوە، بەپێی زانیارییە سەرەتاییەکان "سێ کەس شەوی رابردوو بە چەقۆ کوژراون و، ئەمڕۆ تەرمەکانیان دۆزراوەتەوە". 

ماڵی خێزانە کوژراوەکە دەکەوێتە نزیک مزگەوتێکەوە، مامۆستای مزگەوتەکەش کە رۆژانە پیاوی ماڵەکەی بینیوە، قسەی بۆ رۆژنامەوانان کرد و، لە وەڵامی پرسیاری پەیامنێری رووداودا گوتی "ئەو کارەساتەی لە گەڕەکەکەی ئێمە روویداوە، بەڕاستی کارەساتێکی دڵتەزێنە، ناوەکانیان نازانم، بەڵام پیاوێکە تەمەنی لە نزیکەی 60 بۆ 70 ساڵ دەبێت و، ئافرەتێکیشە کە تەمەنی 50 بۆ 60 ساڵ دەبێت. پیاوەکە کوردە و ئافرەتەکە عەرەبە، منداڵەکەشیان کوڕە و لە دەوری 10 ساڵە".

مامۆستای مزگەوتەکە باسی لەوەش کرد "ئەو پیاوەی کوژراوە، بەردەوام هاتووچۆی مزگەوتی دەکرد، بەڵام بۆ نوێژی بەیانیی ئەمڕۆ نەمانبینیوە، هەروەها نوێژی نیوەڕۆش نەمانبینیوە، بۆیە لەوەدەچێت ئەو کارەساتە پێش نوێژی بەیانی روویدابێت".

مامۆستای مزگەوتەکە، گوتیشی ئەو خێزانە نزیکەی دوو مانگێک دەبێت ماڵیان هاتووەتە گەڕەکەکە، "پیاوی ماڵەکە کە دەهاتە مزگەوت، رۆژانە زوو دەهات، لەلای راست دادەنیشت و بەهۆی ئەوەی پێیەکی تەواو نەبوو، گۆپاڵی پێبوو، پیاوێکی بێ کێشەبوو لەگەڵ خەڵکدا".