رووداو دیجیتاڵ
بەبۆنەی تێپەڕبوونی 32 ساڵ بەسەر راگەیاندنی یەکگرتووی ئیسلامیی کوردستان دا، نوێنەری سەرۆکی حکومەتی هەرێمی کوردستان سەردانی ئەمینداری گشتی و ژمارەیەک بەرپرسی دیکەی ئەو حیزبەی کرد.
رۆژی شەممە 07-02-2026 هەریەکە لە د. پشتیوان سادق، وەزیری ئەوقاف و کاروباری ئایینی؛ د. سامان بەرزنجی، وەزیری تەندروستی؛ ئاریان سەڵاحەدین، بریکاری وەزارەتی رۆشنبیری و ئومێد خۆشناو، پارێزگاری هەولێر بە نوێنەرایەتیی مەسرور بارزانی، سەرۆکی حکومەتی هەرێمی کوردستان سەردانی سەڵاحەدین بەهائەدین، ئەمینداری گشتیی یەکگرتووی ئیسلامیی کوردستان و بەرپرسانی دیکەی حیزبەکەیان کرد. ئامانج لە سەردانەکە پیرۆزبایی بوو لەو حیزبە ئیسلامییە بەبۆنەی تێپەڕینی 32 ساڵ بەسەر دامەزراندنی.
ئومێد خۆشناو، ئەندامی شاندە حکومییەکە لەبارەی سەردانەکەوە نووسیویەتی، "وێڕای گەیاندنی پیرۆزبایی و سڵاو و رێزی سەرۆکی حکومەتی هەرێمی کوردستان،" هیوای پێشکەوتن و سەرکەوتنی زیاتریان بۆ حیزبە ئیسلامییەکە خواست و ئومێدیان خواست وەک هەمیشە لە رۆڵی میانڕەوانەی خۆی بەردەوام بێت بە ئاڕاستەی یەکڕیزی، یەكتر قبووڵكردنی نێوان سەرجەم حیزب و لایەنە سیاسییە كوردستانییەکان.
یەکگرتووی ئیسلامی کوردستان لە 6ـی شوباتی 1994، راگەیەندرا و لە یەکەم کۆنفرانسی یەکگرتووی ئیسلامی کوردستان لە ساڵی 1994، سەلاحەدین بەهادین وەکو سکرتێری گشتی حیزبەکە ھەڵبژێردراوە.
.jpg&w=3840&q=75)