رووداو دیجیتاڵ
عەمید دلێر نەجاڕ، بەڕێوەبەری پۆلیسی هەولێر بە تۆڕی میدیایی رووداوی راگەیاند، ئەو باوکەی کە کچە 15 ساڵانەکەی کوشت، ئەمڕۆ خۆی رادەستی پۆلیس کردووە و لێکۆڵینەوەی لەگەڵدا دەکرێت. برایەکی تۆمەتبارەکەیش دەڵێت، بەکارهێنەری ماددەی هۆشبەر بووە.
پێش نیوەڕۆی رۆژی هەینی، 06-01-2023، لە گەڕەکی موفتیی شاری هەولێر باوکێک کچێکی خۆی کوشت و دواتر بۆ شوێنێکی نادیار هەڵهات. ئەمڕۆ شەممە، عەمید دلێر نەجاڕ، بەڕێوەبەری پۆلیسی پارێزگای هەولێر بە رووداوی راگەیاند، تۆمەتبارەکە خۆی رادەستی هێزەکانیان کردووە و لێکۆڵینەوەی لەگەڵدا دەکرێت.
هۆگر عەزیز، گوتەبێژی پۆلیسی هەولێر لە کۆنفرانسێکی رۆژنامەڤانیدا رایگەیاند، ئەو کەسەی تاوانەکەی کردووە، ناوی (ب، ف، ع)ـە و تەمەنی 35 ساڵە، کچەکەیشی ناوی رەها -یە و تەمەنی 15 ساڵ بووە. گوتیشی، "پێش کوشتنی کچەکەی، بکوژ بە شێوەیەکی 'دڕندانە' ئەشکەنجەی کچەکەی داوە و دواتر کوشتوویەتی."
گوتەبێژی پۆلیسی هەولێر دەڵێت، دوای رووداوەکە هێزەکانیان هەوڵەکانیان چڕکردەوە بۆ دەستگیرکردنی تۆمەتبار، بەڵام ئەمڕۆ شەممە "تۆمەتباری بکوژ" خۆی رادەستی هێزەکانیان کرد و پەڕاوی لێکۆڵینەوەی بۆ رێکخراوە و رەوانەی دادگە کراوە بۆئەوەی سزای یاسایی خۆی وەربگرێت.
پێش خۆرادەستکردنی تۆمەتبارەکە، رێبەر فازڵ، برایەکی تۆمەتبارەکە قسەی بۆ فەرهاد دۆڵەمەری، پەیامنێری رووداو کرد و رایگەیاند، براکەی بەکارهێنەری ماددەی هۆشبەر بووە و پێشتر تەقەی لە خۆی و برایەکی دیکەیشی کردووە.
رێبەر فازڵ گوتی، براکەی زۆر جار هەڕەشەی لە خۆی و براکەی دیکەیشی کردووە و داوای لێکردوون کە پەیوەندییان بە منداڵەکانی ئەوەوە نەبێت. دەشڵێت، "بەڵام ئێمە لەبەر خاتری ئەوە مامی منداڵەکانین کە بەشێوەیەکی خراپ مامەڵەی لەگەڵ دەکردن و وەکو دیل وابوون، هەرکەسێک قسەیەکی کردبا هەڕەشەی لێ دەکرد و منداڵەکان نەیاندەوێرا ئیفادەش بدەن."
ئەو برایەی تۆمەتبارەکە باسی لەوەش کرد، بەهۆی ئەو کارەی براکەیەوە، منداڵەکانی لە خوێندن دابڕاون و خێزانەکەیشی بەوهۆیەوە پێنج مانگە لە کاری مامۆستایەتی دابڕاوە.
.png&w=3840&q=75)