رووداو دیجیتاڵ
کانێکی بەرد لە مهاباد داڕما و بەو هۆیەوە کەسێک گیانی لە دەستدا و یەکێکی دیکەش بریندار بوو.
ئەمڕۆ یەکشەممە 6ـی نیسانی 2025، هاونیشتمانییەک لە شاری مهابادی رۆژهەڵاتی کوردستان بە رووداوی راگەیاند، "کاژێر 10ـی سەر لە بەیانی کانی بەردی عەوڵڵاباد لە نزیک شاری مهاباد رووخا و بەو هۆیەوە کەسێک گیانی لە دەستدا و کەسێکی دیکەش بریندار بووە".
ئەو هاونیشتمانییە گوتی، ئەو کەسەی لە رووداوەکە گیانی لە دەستداوە ناوی حەسەن فەلاحە و تەمەنی 50 ساڵە.
بە گوتەی ئەو هاونیشتمانییە تیمەکانی فریاگوزاری لە شوێنی رووداوەکە بوون، کەسێکیان بە برینداری لە ژێر دارو و پەردوو دەرهێناوە دوای چارەسەری سەرەتایی گوێزراوەتەوە بۆ نەخۆشخانە و تەرمی ئەو کەسەش کە گیانی لە دەستداوە گوێزراوەتەوە بۆ دادپزیشکیی مهاباد.