چیرۆکی پەلاماردانی منداڵێکی سێ ساڵ لەلایەن 8 سەگەوە لە هەولێر؛ 'هێشتا ئەو شۆکە بەری نەداوە'

تانیا کاتێک لە ماڵەوە دەچێتە دەرەوە و دایکی ئاگای لێ نییە، هەشت سەگ پەلاماری دەدەن و بە سەختی برینداری دەکەن. لینا، دایکی تانیایە و دەڵێت، "دوو دەقە نەبوو خافڵ بووم لێی، چووە دەرەوە و هەشت سەگ پەلاماریان دا. هەموو لەشی برینە، برینەکەش لەسەر جەستەی دەمێنێتەوە و ناچێت. داوا لە حکومەتی هەرێمی کوردستان و پارێزگاری هەولێر دەکەم چارەسەرێک بدۆزنەوە."

بەپێی ئامارە نافەرمییەکان، تەنیا لە شاری هەولێر، زیاتر لە 20 هەزار سەگی بێلانە هەن. بەگوێرەی پڕۆژەیەکی حکومەتیش، مانگانە نزیکەی 10 ملیۆن دینار بۆ گرتن و کۆکردنەوەی سەگی بێلانە پێویستە.

باوکی تانیا دەڵێت، چەند جارێک داوایان کردووە کە چارەسەری کێشەی سەگی بێلانەیان بۆ بکەن کە لەبەردەم ماڵەکەیان هەیە، بەڵام وەک خۆی دەڵێت، کەس گوێی لێنەگرتوون.

ئەحمەد محەممەد، باوکی تانیا باس لەوە دەکات، "گلەییم لە کۆمپانیای خاوەنی پڕۆژەکە هەیە کە ئەم منداڵە چ گوناهێکی هەیە، ئایا خۆی ئەوە قبووڵ دەکات کە سەگ پەلاماری منداڵەکانی ئەو بدەن. دەبێت رۆژانە لە نەخۆشخانە چارەسەری بۆ بکرێت، هەندێ جێگە لە لەشی هەیە دڕاوە و نابێت ئێستا بدوورێتەوە، دوای هەفتەیەک دکتۆر بڕیاری لەسەر دەدات."

بە گوتەی ئومێد خۆشناو، پارێزگاری هەولێر؛ لەسەر رووبەری 20 دۆنم زەوی پەناگە بۆ سەگی بێلانە لە هەولێر دروستدەکرێت و وک سەرەتاش بڕی 500 ملیۆن دیناریان بۆ تەرخانکردووە، دەشڵێت، ئەو پەناگەیە 15 کیلۆمەتر لە ناوەندی هەولێرەوە دوورە.