رووداو دیجیتاڵ
رەوتی هەڵوێستی نیشتمانی دوو بەربژێری لە لیستەکەی دوورخستەوە و سەرۆکی رەوتەکە بە "رێککەوتن" لەگەڵ یەکێتیی نیشتمانیی کوردستان تۆمەتباریان دەکات.
ئیدریس محەممەد، بەرپرسی بەشی هەڵبژاردنی رەوتی هەڵوێست ناوی بەربژێرەکانی بۆ رووداو ئاشکرا کرد و گوتی، "ئەو دوو بەربژێرە رێباز عەبدوڵڵا لە چەمچەماڵ و مونیرە عەبدوڵڵا لە سلێمانیین.''
بەرپرسەکەی رەوتی هەڵوێست دەڵێت: "ئێمە بەردەوام دەبین لە کارکردنی خۆمان و هیچ شتێک ساردمان ناکاتەوە".
عەلی حەمە ساڵح، سەرلیستی رەوتی هەڵوێست لە بازنەی هەولێر لە پۆستێکدا لە تۆڕی کۆمەڵایەتیی فەیسبووک رایگەیاند: "بەهۆی هەبوونی پەیوەندی و هەوڵدان بۆ خۆفرۆشتن بە یەکێتی، رەوتی هەڵوێست دوو کاندیدی خۆی دوورخستەوە".
هەردوو بەربژێرەکە ناویان لەلای کۆمیسیۆنەوە پەسندکراوە و دەمێنێتەوە، ئەو دوورخستنەوەیە لەنێو حیزبێک دایە. نەبەرد عومەر، بەرپرسی لقی هەرێمی کوردستانی کۆمیسیۆنی باڵای سەربەخۆی هەڵبژاردنەکانی عێراق لەسەر هەمان پرس بە رووداوی راگەیاند: "ئەوانە ناویان لە لیستی دەنگدان ناسڕێتەوە و لە کۆمسیۆن ناویان هەر دەمێنێت، تەنیا لەلایەن حیزبکەیانەوە کشێنراونەتەوە".
تاوەکو ئێستا کۆمیسیۆن یەک بەربژێری یەکێتی لە سلێمانی لەسەر ساختەکردنی بڕوانامەکەی دوورخستووەتەوە.
رۆژی 3ـی تشرینی یەکەمی 2025، بانگەشەی هەڵبژاردن لە هەرێمی کوردستان و عێراق دەستیپێکرد، رۆژی شەممە 8-11-2025 بانگەشەی هەڵبژاردن کۆتایی دێت.
