رووداو دیجیتاڵ
حکومەتی عێراق سەرکۆنەی هێرشەکەی دوێنێی گەریلاکانی پارتی کرێکارانی کوردستان دەکات بۆ سەر هێزەکانی پێشمەرگە لە پارێزگای دهۆک.
لە راگەیێندراوێکدا حکومەتی عێراق دەڵێت: "سەرکۆنەی هێرش و پەلاماری چەکدارانی سەر بە پارتی کرێکارانی کوردستان دەکەین، کە هێزەکانی پێشمەرگەی لە پارێزگای دهۆک کردووەتە ئامانج، بەهۆیەوە شەهید و برینداری لێکەوتووەتەوە".
رۆژی چوارشەممە لە سنووری ناحیەی چەمانکێی سەر بە قەزای ئامێدی، مینێکی چێندراوی پارتی کرێکارانی کوردستان بە هێزێکی پێشمەرگەدا تەقییەوە و بەو هۆیەوە پێشمەرگەیەک شەهید بوو و دوو پێشمەرگەش بریندار بوون.
حکومەتی عێراقی دەڵێت: "بە تووندی ئەو هێرشە رەتدەکەینەوە، کە لەنێو خاکی عێراقدا کراوە، ئەمە هێرشە بۆ سەر سەروەریی عێراق، رێکارەکان دەگرنەبەر بۆ ئەوەی سنوورێک دابنرێت بۆ ئەو هێرش و پەلامارانە، کە ئاسایش و سەروەریی عێراق پێشێل دەکات".
فەریق جەمال ئیمنکی، سوپاسالاری وەزارەتی پێشمەرگە لەبارەی رووداوەکەوە بە تۆڕی میدیایی رووداوی راگەیاندبوو، هێزێکی پێشمەرگەی یەکەی 80 بە سەردان چوونەتە ئەو ناوچەیە، کە لەو ناوچەیە پێشمەرگە و پەکەکەش هەن. بەڵام رێگەیەکی سەرەکی هەیە لەنێوان ناحیەی چەمانکێ بەرەو ناوچەی بەرواری ژێری و سەرێکانیکا و بێبادێ و ئەو ناوچانە، تی ئێن تییەک لەسەر رێگاکە دانرابوو، بە ئۆتۆمبێلەکەیاندا تەقانێندراوەتەوە، پێشمەرگەیەک شەهید بووە و دووانی دیکەش بریندار بوون.
سوپاسالاری وەزارەتی پێشمەرگە هەروەها دەڵێت پەکەکە تەقەشیان لە پێشمەرگە کردووە. ئەوەش بە کارێکی تێکدەرانە ناودەبات لەلایەن پەکەکەوە کە پێیوایە دەیانەوێت شەڕی کورد و کورد بکەن.
حکومەتی هەرێمی کوردستان بەتووندی ئیدانەی هێرشەکەی پەکەکەی بۆ سەر هێزی پێشمەرگە کرد و رایگەیاند، هەرێمی کوردستان، قەوارەی سیاسی و شەرعیی خەڵکی کوردستانە، هێزی پێشمەرگەش پارێزەری خاک و خەڵکی کوردستانە، بۆیە هەر هێرشێکی لەم جۆرە هێرشکردنە بۆ سەر تەواوی خەڵکی کوردستان.
دواتر هێزەکانی پاراستنی گەل - هەپەگە، باڵی سەربازیی پارتی کرێکارانی کوردستان، لەبارەی رووداوەکە راگەیێندراوێکی بڵاوکردەوە و رایانگەیاند، هێزێکی پێشمەرگە ویستوویەتی "بچنە نێو کامپێکمان لە گارە"، بۆیە ئەوانیش دوو مینیان تەقاندووەتەوە بۆ رێگریکردن لە هێزەکەی پێشمەرگە و دەشڵێت، شەڕیان نەکردووە و چەکیان بەکارنەهێناوە.
هەروەها شەوی رابردوو 4-11-2020 سەرۆکایەتیی هەرێمی کوردستانیش رووداوەکەی چەمانکێی بە پێشهاتێکی مەترسیدار ناوبرد و رایدەگەیێنێت، هێرشەکەی ئەمڕۆی پەکەکە هێرشە بۆ سەر ژیان و ئارامیی خەڵک و خاکی کوردستان.
لە راگەیێندراوەکەدا سەرۆکایەتیی هەرێمی کوردستان بە ئاماژەدان بەوەی، ئهم هێرشه هیچ پاساوێک هەڵناگرێت و هێرشە بۆ سەر ژیان و ئارامیی خەڵک و خاکی کوردستان رایدەگەیێنێت، لەکاتێکدا گەلی کوردستان گیرۆدەی چهندين قەیران و کێشەیه، ئەم شەڕپێفرۆشتن و بارگرژییە لهلايهن پهكهكهوه، دۆخی ههرێمی کوردستان و گەلەکەمان دووچاری نەهامەتیی زیاتر دەکاتهوه و كهس تيايدا براوه نييه.
سەرۆکایەتیی هەرێمی کوردستان بەپێویستیی دەزانێت "پهكهكه رێز لە قهوارهى دهستووريى هەرێمى كوردستان و حکومەت و دامەزراوە شەرعییەکانی بگرێت و شەڕ و گێچەڵ لە کوردستان دوور بخاتهوه".
