بەرپرسێکی باڵای سۆسیال دیموکرات بۆ رووداو: 9 پێشمەرگەمان دەستگیرکراون

سەرچاوەیەکی باڵا لە پارتی سۆسیال دیموکراتی کوردستان، ئەمڕۆ سێشەممە بە سازگار سەلاح، پەیامنێری رووداوی گوت: "03ـی ئاب، ئۆتۆمبێلێک لە رێگەی هەڵەبجە – سەیدسادق نزیک بازگەیەکی سۆسیالیست تەقەی کردووە، پێشمەرگەکانی بازگەکە دوای کەوتوون و تەقەیان لێکردووە، چەند گولـلەیەک بەر ئۆتۆمبێلی هاونیشتمانییەک کەوتووە و زیانی گیانی نەبووە، رووداوەکە لەوەوە دروستبووە".

بەگوتەی ئەو سەرچاوەیە، دوێنێ  لە نزیک گوندی گوڵەخانە کە بارەگا و سەرۆکی سۆسیال دیموکراتی کوردستانی لێیە، هێزە ئەمنییەکان بازگەیەکیان داناوە "هەر کەسێک ناسنامەی پێشمەرگەی سۆسیالیستی پێ بووە دەستگیریان کردووە".

بەگوتەی بەرپرسانی سۆسیال دیموکرات، نۆ پێشمەرگەیان دەستگیرکراون و لە "ژووری تاکەکەسی لە هەڵەبجە دەستبەسەر کراون".

ئاکام قوتبەدین، گوتەبێژی پۆلیسی هەڵەبجە بە رووداوی گوت: "هیچ کەیسێکی لەو شێوەیە لای ئێمە نییە".

بەگوێرەی زانیارییەکانی تۆڕی میدیایی رووداو، ئەو پێشمەرگانە لەلایەن بەڕێوەبەرایەتی گشتیی ئاسایشی هەڵەبجەوە دەستبەسەر کراون.