رووداو دیجیتاڵ
بە ئامادەبوونی سەرۆکوەزیرانی هەرێمی کوردستان، یاری کۆتایی خولی پاڵەوانێتی تۆپی پێی دیپلۆماسی لە هەرێمی کوردستان، لەنێوان تیپی کۆنسووڵخانەی تورکیا و ئوردن بەڕێوەچوو.
یارییەکە ئێوارەی دوێنێ بە ئامادەبوونی مەسرور بارزانی، سەرۆکی حکومەتی هەرێمی کوردستان، سەفین دزەیی بەرپرسی پەیوەندییەکانی دەرەوەی حکومەت و ژمارەیەک لە وەزیرانی هەرێمی کوردستان و کۆنسووڵی وڵاتان لە شاری هەولێر بەڕێوەچوو.
خولی پاڵەوانێتی تۆپی پێی دیپلۆماسی لەلایەن فەرمانگەی پەیوەندییەکانی دەرەوەی حکومەت رێکخرا بوو.
یاری کۆتایی خولەکە لەنێوان هەردوو تیپی کۆنسووڵخانەی گشتیی تورکیا و کۆنسووڵخانەی گشتیی ئوردن بەڕێوەچوو، تێیدا تورکیا سەرکەوتنی بەدەستهێنا و بووە پاڵەوانی خولەکە.
فەرمانگەی پەیوەندییەکانی دەرەوەی هەرێمی کوردستان رایگەیاند، "وەک نەریتێکی ساڵانە فەرمانگەی پەیوەندییەکانی دەرەوە لە پێناو دروستکردنی کەشێکی دۆستانە لە نێوان دیپلۆماتکار و ستافی کونسوڵگەرییەکان ئەم پاڵەوانەتییە رێکدەخات".
لە خولەکەدا کە 20 رۆژی خایاند، 15 تیپی تۆپی پێ بەشدارییان کرد.
پێش یاری کۆتایی، سەفین دزەیی رایگەیاند، "مەبەست [لە یارییەکانی خولەکە] بردنەوە و دۆڕاندن نییە، بەڵکو دروستکردنی کەشێکی لەبارە لەسەر خاکی هەرێمی کوردستان بۆ دیپلۆماتکاران".
