04-05-2020
13:30
سەرۆك بارزانی سەرەخۆشی لە خانەوادەی هونەرمەند سەعید گاباری دەکات
بەناوی خودای مەزن و دلۆڤان
خانەوادەی بەڕێزی هونەرمەند سەعید گاباری
به‌داخ و په‌ژاره‌یه‌كی زۆره‌وه هه‌واڵی كۆچی دوایی هونەرمەندی شۆڕشگێڕ و ناوداری گەلەکەمان، سەعید گاباری ـمان پێگه‌یشت.
ئەو هونەرمەندە هەموو ژیانی خۆی بۆ خزمەتی هونەری ڕەسەنی کوردی و دۆزی ڕەوای گەلەکەی تەرخان کرد و لەدەستدانی خەسارەتێکی گەورەیە. سه‌ره‌خۆشی له خانەوادە تێکۆشەرەکەتان و تەواوی خزم و ئاشنایانتان و هونەرمەندانی کوردستان دەكەین و خۆمان بە ھاوبەشی خەمتان دەزانین.
لە خوای گه‌وره داواکارین گیانی هونەرمەندی کۆچکردوو بخاتە بەر ڕەحمەتی خۆی و ئۆقرەیی و ئارامییش بەھەموولایەك ببه‌خشێت.
انا للە وانا الیە راجعون
مسعود بارزانی
٤ـی٥ـی٢٠٢٠
زیاتر بخوێنەوە
12:44
مەسرور بارزانی: گاباری رۆڵێکی بەرچاوی لە پشتگیریکردنی پێشمەرگەدا هەبوو
مەسرور بارزانی ، سەرۆکی حکومەتی هەرێمی کوردستان پرسەنامەیەک بۆ کۆچی دوایی هونەرمەند سەعید گاباری دەنێرێت و رایدەگەیێنێت: "بەداخێکی زۆرەوە هەواڵی کۆچیدوایی هونەرمەندی نیشتمانپەروەر و ناسراوی کوردستان ( سەعید گاباری)م بیست ، هونەرمەند سەعید گاباری خزمەتێکی زۆری هونەری کوردی کردووە و لە رێگەی گۆرانیەکانیشی رۆڵێکی بەرچاوی لە پشتگیریکردنی پێشمەرگەدا هەبوو".
سەرۆکی حکومەتی هەرێمی کوردستان، پرسە و سەرەخۆشی لە بنەماڵەکەی دەکات و لە "خوای مەزن" داواکارە "گیانی بە بەهەشت شاد بکات و ئارامی و دڵنەواییش بە کەسوکار و دۆستانی ببەخشێت".
زیاتر بخوێنەوە
09:41
سەرۆکی هەرێمی کوردستان: سەعید گاباری ئەرشیڤێکی دەوڵەمەند دوای خۆی جێدەهێڵێت
سەرۆکی هەرێمی کوردستان سەرەخۆشی کۆچی دوایی هونەرمەند سەعید گاباری لە کەسوکارەکەی دەکات و رایدەگەیێنێت سه‌عيد گابارى "ده‌نگێكى به‌سۆز و ڕه‌سه‌نى كوردييه و دوای خۆی ئه‌رشيڤێكى ده‌وڵه‌مه‌ندى مۆسيقا و گۆرانى جێدەهێڵێت".
بەرەبەیانی ئەمڕۆ سەعید گاباری لە نەخۆشخانەی سەردەمی هەولێر کۆچی دوایی کرد. نێچیرڤان بارزانی، سەرۆکی هەرێمی کوردستان لە پەیامێکدا رایگەیاند: "به‌داخه‌وه هه‌واڵى كۆچى دواييى هونه‌رمه‌ندى ناودارى كوردستان خوالێخۆشبوو سه‌عيد گاباريم پێگه‌يشت. به‌م بۆنه خه‌مناكه‌وه پرسه و سه‌ره‌خۆشى له خانه‌واده و كه‌سوكار و دۆست و هاوڕێيانى ده‌كه‌م و هاوسۆز و هاوخه‌ميانم. خواى مه‌زن گيانى به به‌هه‌شت شاد بكات و سه‌بووريى هه‌موو لايه‌ك بداته‌وه".
نێچیرڤان بارزانی ، سه‌عيد گابارى بە ده‌نگێكى به‌سۆز و ڕه‌سه‌نى كوردی ناودەبات کە "ساڵانێكى دوور و درێژ خزمه‌تى گۆرانى و مۆسيقاى كوردى كردووه و له سه‌رده‌مى شۆڕشدا چه‌ندين سروود و گۆرانى به‌جۆشى بۆ خه‌بات و پێشمه‌رگه چڕيوه".
سەرۆکی هەرێمی کوردستان هەروەها لە پەیامەکەیدا دەڵێت: "سەعید گاباری ئه‌رشيڤێكى ده‌وڵه‌مه‌ندى مۆسيقا و گۆرانى له دواى خۆى جێده‌هێڵێت و به كار و به‌رهه‌مه‌كانى، يادى ئه‌و وه‌ك هونه‌رمه‌ندێكى لێهاتوو هه‌ميشه به زيندوويى ده‌مێنێته‌وه".
07:49
سەعید گاباری هونەرمەندی ناوداری کورد کۆچی دواییکرد
رووداو
رووداو - هەولێر
بەرەبەیانی ئەمڕۆ هونەرمەندی نێوداری کوردستان سەعید گاباری لە هەولێر بەهۆی نەخۆشیی شێرپەنجەوە کۆچی دوایی کرد.
مەهدی فەرەج، پەیامنێری رووداو لە هەولێر رایگەیاند: "کاژێر 04:45 خولەکی سەرلەبەیانی ئەمڕۆ دووشەممە 4-5-2020 هونەرمەندی نێوداری کوردستان و خەڵکی شاری حەسەکەی رۆژئاوای کوردستان سەعید گاباری لە تەمەنی 64 ساڵی بەهۆی نەخۆشیی شێرپەنجەی سییەکانەوە لە نەخۆشخانەی سەردەمی هەولێر کۆچی دوایی کرد".
پەیامنێری رووداو دەڵێت، ماوەی 20 رۆژ دەبێت هونەرمەند سەعید گاباری بەهۆی دەرکەوتنی نیشانەکانی ئەو نەخۆشییە و کاریگەری لەسەری لە نەخۆشخانە خەوێندرابوو، هەرچەند ئەمڕۆ بڕیاربوو لەسەر فەرمانی سەرۆکی حکومەتی هەرێمی کوردستان ببرێتە ئەڵمانیا، بەڵام ئەو بەرەبەیانییە هەر بەهۆی ئەو نەخۆشییەوە کۆچی دوایی کرد.
بڕیارە هەر ئەمڕۆ تەرمی هونەرمەند سەعید گاباری، لەسەر وەسیەتی خۆی لە گۆڕستانی مەلائۆمەر لە شاری هەولێر لەنزیک خێزان و کەسوکارەکەی بەخاک بسپێردرێت.
پەیامنێری رووداو دەشڵێت، بەهۆی گرتنەبەری رێکارەکانی خۆپارێزی لە بڵاوبوونەوەی ڤایرۆسی کۆرۆنا پرسە بۆ هونەرمەندی کۆچکرد و سەعید گاباری دانانرێت.
سەعید گاباری، خەڵکی شاری حەسەکەی رۆژئاوای کوردستانە، ساڵی 1956 لەدایک بووە و لە تەمەنی هەشت ساڵییەوە بینایی چاوەکانی لەدەستداوە، لە ساڵی حەفتایەکانیشەوە دەستی بە گۆرانی گوتن کردووە، لە ساڵی 1980ـەوە هاتووەتە باشووری کوردستان و بە هونەرەکەی شانبەشانی پێشمەرگە جەنگاوە، زۆرترین تێکستی گۆرانییەکانیشی هی هۆزانڤانانی ناوداری کورد جگەر خوین و تیرێژ بووە. خاوەنی چوار هەزار و 712 گۆرانی بووە.
