رووداو دیجیتاڵ
بەرپرسی هاتووچۆی کەسنەزان دەڵێت، دوێنێ شەو لە رووداوێکی هاتووچۆدا لەنێوان دوو ئۆتۆمبێل و ماتۆڕسکیلێکدا دوو کەس گیانیان لەدەستداوە.
رۆژی چوارشەممە 3ی ئەیلوولی 2025 رائید عومەر مەمەد حەسەن، بەرپرسی بنکەی هاتووچۆی کەسنەزان، بە تۆڕی میدیایی رووداوی راگەیاند: "رووداوێکی هاتووچۆ لەنێوان دوو ئۆتۆمبێلی جۆرەکانی گۆڵف و کامری لەگەڵ ماتۆڕسکیلێکدا روویداوە، لە ئەنجامدا شۆفێری ماتۆڕسکیلەکە و کەسێکی دیکە کە لەگەڵی بوو گیانیان لەدەستدا."
رووداوەکە کاژێر 09:00ـی دوێنێ شەو روویداوە. رائید عومەر مەمەد دەڵێت، "لێکۆڵینەوە لە رووداوەکە بەردەوامە و هێشتا روون نییە کە هەڵە لە کامیان بووە، شۆفێری کامرییەکەش هەڵاتووە."
بەرپرسی بنکەی هاتووچۆی کەسنەزان گوتی، "ئەو دوو کەسە مێرمنداڵن و تەمەنیان 11 ساڵە، رووداوەکە لەسەر رێگەی هەولێر-پیرمام بووە."
بە گوتەی رائید عومەر مەمەد، شۆفێری گۆڵفەکە دەستگیرکراوە و لە بنکەی پۆلیسی پیرزینە.
تەرمی ئەو دوو مێرمنداڵە دوای پزیشکی دادی، رادەستی خێزانەکانیان کراوەتەوە.
