رووداو دیجیتاڵ
لیژنەى هەرێم و پارێزگاکانى پەرلەمانى عێراق نووسراوێکى ئاراستەى سەرۆکایەتیى پەرلەمان کرد، بۆ ئەوەى دەنگدان بە پڕۆژەیاسای بەپارێزگاکردنى هەڵەبجە بخەنە کارنامەى کۆبوونەوەکانی داهاتووی پەرلەمان.
کوردە عومەر، جێگرى دووەمى سەرۆکى لیژنەى هەرێم و پارێزگاکانى پەرلەمانى عێراق بە تۆڕى میدیایی رووداوى راگەیاند، رۆژی 31ـی کانوونى دووەم بە زۆرینەى دەنگى ئەندامانى لیژنەکەیان نووسراوێکیان ئاراستەى سەرۆکایەتیى پەرلەمان کردووە بۆ ئەوەی پڕۆژەیاسای بەپارێزگاکردنی هەڵەبجە بخرێتە دەنگدانەوە.
پڕۆژەیاسای بە پارێزگاکردنی هەڵەبجە لە چوار مادە پێکهاتووە؛ یەکەم مادە باسی بە پارێزگاکردنی هەڵەبجە دەکات وەک نۆزدەیەمین پارێزگاى عێراق، کە ناوەندى پارێزگاکە شارى هەڵەبجە دەبێت، بەپێی مادەى دووەمیش ئەنجوومەنى وەزیرانى هەرێمى کوردستان سنوورى یەکە ئیدارییەکانى پارێزگاکە دیاری دەکات.
جێگرى دووەمى سەرۆکى لیژنەى هەرێم و پارێزگاکانى پەرلەمانى عێراق گوتى، "بەڵێن دراوە پرۆژەکە بخرێتە دەنگدانەوە."
رۆژی 18ـی ئەیلوولى 2023، بڕگەى دەنگدان بە پڕۆژەیاساى بەپارێزگاکردنى هەڵەبجە لە خشتەى کۆبوونەوەى پەرلەمانى عێراق دانراو دواتر لادرا و لەو کاتەوە ئەو دەنگدانە نەخراوەتە بەرنامەى کارەوە.
بە گوێرەى زانیارییەکانى تۆڕى میدیایی رووداو، ئەگەر هەیە لە کۆبوونەوەکانى هەفتەى داهاتووى پەرلەمانى عێراق، پڕۆژەیاساکە بخرێتە دەنگدانەوە.
پڕۆژەیاسای بەپارێزگاکردنى هەڵەبجە، بە بڕیاری ئەنجوومەنی وەزیرانی فیدراڵ، لە رۆژی 13-03-2023 پەسندکرا، بە نووسراوی ئەمیندارێتیی گشتیی ئەنجوومەنی وەزیران لە 14-03-2023 رەوانەی پەرلەمان کرا بۆ ئەوەى پەسند بکرێت.