کوردستان
وێنەیەکی وەرگیراو لە گرتەیەکی ڤیدیۆیی تێیدا ئۆتۆمبێلێکی سوات دەردەکەوێت، کە دەگوترێت بەشێکی زیندانییە رادەستکراوەکانی تێدا بووە
prev
next
رووداو دیجیتاڵ
گوتەبێژی هاوپەیمانیی عەزم لە کەرکووک، رایگەیاند لەو زیندانییانەی دوێنێ لە سلێمانییەوە رادەستی هێزە ئەمنییەکانی کەرکووک کرانەوە، تەنیا 11ـیان خەڵکی پارێزگای کەرکووک بوون.
شەممە 30-11-2024 هێزە ئەمنییەکانی سلێمانی، 29 زیندانیان رادەستی هێزە ئەمنییەکانی کەرکووک کرد، ئەمەش دوای رێککەوتنێکی یەکێتیی نیشتمانی کوردستان لەگەڵ لایەنی عەرەبی لە کەرکووک.
عەزام حەمدانی، گوتەبێژی هاوپەیمانیی عەزم لە کەرکووک، ئەمڕۆ (یەکشەممە، 01-12-2024) بە تۆڕی میدیایی رووداوی راگەیاند، جگە لەو 11 بەندکراوەی خەڵکی کەرکووک، ئەوانی دیکە خەڵکی ئەنبار، سەلاحەدین، نەینەوا، بەغدا و دیالە بوون.
گوتەبێژی هاوپەیمانیی عەزم لە کەرکووک دەڵێت، ئەو کارە لە ئاستی چاوەڕوانی عەرەبی کەرکووک نەبووە، "تووشی بێئومێدی بوون، چاوەڕێی ئازادکردنی سەتان کەسیان دەکرد، کەچی 11 کەسی خەڵکی پارێزگای کەرکووک رادەستکراون."
بەگوتەی عەزام حەمدانی، رێککەوتنەکە وەک خۆی جێبەجێ نەکراوە، بۆیە دەڵێ هیوادارن لە قۆناخەکانی دیکە ژمارەی رادەستکراون زۆر لەمە زیاتربێت.
گوتەبێژی هاوپەیمانیی عەزم گوتی، ئەوانەی دوێنێ رادەستی هێزە ئەمنییەکانی کەرکووک کراون، لێکۆڵینەوە لە دۆسییەکانیان دەکرێت، ئەگەر هیچیان لەسەر نەبێت، بە رێکاری یاسایی ئازاد دەکرێن؛ بەڵام هەندێک لەوانەی رادەستکراونەتەوە ناسراون، کە داعش بوون و تاوانیان کردووە.
ئەو لیستەی دوێنێ رادەستکراون 29 کەس بوون، تەنیا 11ـیان خەڵکی پارێزگای کەرکووکن. 6ـیان بەغدا، 5 سەلاحەدین، 3 ئەنبار، دوو نەینەوا، یەک دیالە و یەک سەماوە.
یەکێتیی نیشتمانیی کوردستان لەگەڵ سێ نوێنەری عەرەب و کۆتاکەی کریستیان حکومەتی خۆجێیی کەرکووکی پێکهێناوە.
نێوەڕۆکی کۆبوونەوەی یەکێتیی نیشتمانیی کوردستان و لایەنی عەرەبی لەبارەی زیندانییانی عەرەبی کەرکووک بڵاوبووەتەوە، کە وا دەردەکەوێت لەسەر سێ خاڵ رێککەوتوون.
یەکەم: دۆسیەی ناوی سەرجەم دەستگیرکراون بدرێتە لیژنەکە.
دووەم: هۆکاری دەستگیرکردنی دەستگیرکراوەکان بدرێتە لیژنەکە.
سێیەم: رێککەوتن کراوە ئەو کەسانە رادەستی لایەنی فەرمی لە کەرکووک بکرێن. رادەستکردنی یەکەم کاروانی دەستگیرکراوەکان رۆژی شەممە 30-11-2024 دەبێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ