رووداو - تەندروستی
توێژینەوەیەکی نوێ لە زانکۆی کالیفۆرنیا لە ئەمریکا دەریدەخات، کەمیی ڤیتامین B12 لە بەساڵاچووان ئەگەری تووشبوون بە نەخۆشیی لەبیرچوونەوە زیاددەکات.
توێژینەوەکە ئاماژە بەوەدەکات، کەمیی ئەم ڤیتامینە برین لە ماددە سپییەکانی مێشکیان دروستدەکات و ئەمەش دەکرێت نیشانەیەکی ئاگادارکردنەوە بێت بۆ دابەزینی توانای هزریی و نەخۆشیی لەبیرچوونەوە.
د. ئاری گریین، سەرپەرشتیاری توێژینەوەکە دەڵێت، ''دەبێت گرنگی بە خواردنی سەرچاوەی خۆراکیی دەوڵەمەند بە ڤیتامینەکان بدرێت و تەواوکەریی خۆراکی بەکاربهێندرێت''.
بە گوێرەی مایۆکلینیک، نیشانەکانی کەمیی ڤیتامین B12 بریتین لە 'هەستکردن بە ماندوویێتی، سڕبوون و تەزینی دەست و قاچ، ئازار و برینی بچووکی نێو دەم'.
بەپێی رێکخراوی تەندروستیی جیهانی، هەریەکە لە گۆشت، ماسی، خۆراکە دەریاییەکان، هێلکە و شیرەمەنییەکان دەوڵەمەندن بە ڤیتامین B12.
