رووداو - تەندروستی
پسپۆڕێکی نەخۆشییەکانی پێست و جوانکاری رایدەگەیێنێت، بەرگەسەرین و هەر رووکەشێک کە بەر پێست و دەستەکان بکەوێت دەشێت هۆکار بن بۆ دروستبوونی زیپکە.
د. هۆزان کەمال مکورجی، پسپۆڕی نەخۆشییەکانی پێست و جوانکاری بە رووداوی راگەیاند، هەڵکۆڵین و دەستدان لە زیپکە باوترین خووی ناتەندروستە بۆ زۆربوون و ئاڵۆزبوونی ماکەکانی زیپکە.
بە گوتەی د. هۆزان مکورجی، زۆرینەی ئەوانەی رۆژانە دەیانبینن کە گیرۆدەی زیپکەن لەنێوان تەمەنی 15 بۆ 20 ساڵانن و دەڵێت: ''لەو تەمەنە گۆڕانی هۆرمۆنەکانی باڵخبوون هۆکاری سەرەکییە بۆ زیپکە''.
دەقی وەڵامەکانی د. هۆزان کەمال مکورجی، پسپۆڕی نەخۆشییەکانی پێست و جوانکاری لەبارەی زیپکە و چارەسەرەکانی؛
رووداو: بەپێی ئەو کەیسانەی کە رۆژانە دەیانبینن، ئەوانەی کە زیپکەیان هەیە لە چ تەمەنێکدان؟
د. هۆزان کەمال: زۆرینەی ئەوانەی رۆژانە دەیانبینین کە گیرۆدەی زیپکەن لەنێوان تەمەنی 15 بۆ 20 ساڵانن کە هەندێکجار لە پێش و دوای ئەو تەمەنەش دەشێت زیپکە دروستببێت.
رووداو: بۆچی تەمەنی نەوجەوانی زیپکە زۆر دەبێت؟
د. هۆزان کەمال: چونکە لەو قۆناخەدا سەرەتای دەرکەوتنی سیفەتە توخمییە دووەمییەکانی مرۆڤە و هۆرمۆنەکانی باڵخبوون زیاددەردەدرێن، ئەمەش وادەکەن کە چەورییە رژێنەکانی پێست زیاتر چالاکبن و ئەمەش دەبێتەهۆکارێک بۆ گەشەی بەکتریاکان لەژێر پێستدا، هەر بۆیە گۆڕانکاریی ئەو هۆرمۆنانە تاوەکو ناوەڕاستی تەمەنی بیستەکان دەخایەنێت.
رووداو: ئایا ئەو خووە ناتەندروستانە چین کە هۆکارن بۆ زیپکە؟
د. هۆزان کەمال: چەند خوویەکی ناتەندروست هەن بۆ ئەوە وەکو؛
- بەستنی دەموچاو بە پەڕۆی تووند.
- بەکارهێنانی ماکیاژی چەور کە کوونیلەکانی پێست دەگرێت.
- هەڵکۆڵین و دەستدان لە زیپکە، چونکە پڕە لە بەکتریا و لەگەڵ هەر تەقینێکی بە پێستدا بڵاودەبنەوە.
- نەشۆردنی دەموچاو بۆ ماوەیەکی زۆر.
رووداو: چ خۆراکێک دەبێتەهۆی کەمکردنەوەی زیپکە؟
د. هۆزان کەمال: کاریگەریی خۆراک لەسەر زیپکە بە ئەرێنی و نەرێنی تاوەکو ئێستا نەسەلمێندراوە، بەڵام چەند توێژینەوەیەک هەن کە دەیسەلمێنن؛ شوکولاتە، شیرینییەکان و ئەو خۆراکانەی رێژەی ئەنسۆلین بە خێرایی لە خوێندا بەرزدەکەنەوە، ئەگەری دروستبوونی زیپکە زیاددەکەن.
رووداو: ئایا هیچ ماسکێک هەیە رێگری لە زیپکە بکات؟
د. هۆزان کەمال: ئێمە رێنوێنیی هیچ کەسێک ناکەین کە ماسکی تێکەڵەی هێلکە، ماست و خەیار بەکاربهێنێت، بەڵام ئەگەر هاتوو کەسێک پێستی چەور بێت، دەتوانێت ئەو ماسکانە بەکاربهێنێت کە ترشی سالیسالیک یان ئەلفا هایدرۆکسییان تێدایە، هەروەها نابێت بەبێ راوێژی پزیشک هیچ جۆرە ماسکێک بەکاربهێندرێت.
رووداو: هیچ دەرمانێک هەیە راستەوخۆ زیپکە نەهێڵێت؟ چونکە رێکلام بۆ هەندێک بەرهەم دەکرێت کە گوایە ''راستەوخۆ زیپکە لادەبات''
د. هۆزان کەمال: هیچ دەرمانێک نییە راستەوخۆ زیپکە نەهێڵێت، چونکە زیپکە یەکێکە لە کێشە درێژخایەنەکانی پێست و قۆناخ بە قۆناخ چارەسەردەکرێت. چونکە بە گەڕانەوە بۆ هۆکارەکانی زیپکە ناتواندرێت هیچ دەرمانێک دروستبکرێت بۆ بنبڕکردن و چاکبوونەوەی زیپکە بە شێوەیەکی خێرا.
رووداو: هایدرۆفایشیاڵ بۆ لابردنی زیپکە بەسوودە؟
د. هۆزان کەمال: بەڵێ یارمەتیی کەمکردنەوەی زیپکە دەدات، بەڵام تاکە چارەسەر نییە و دەبێت دەرمان و مادەی دیکەش لەگەڵیدا بەکاربهێندرێن.
رووداو: ئایا بەرگە سەرین زیپکە دروستدەکات؟
د. هۆزان کەمال: بەرگەسەرین یان هەر رووکەشێکی دیکە کە رۆژانە پێست بەری دەکەوێت یاخود دەستمان بەری دەکەوێت کە دواتریش دەست لە پێست دەدەین، هۆکارێکن بۆ زیادبوون و تێکەڵبوونی ئەو بەکتریایانەی لەسەر پێست هەن، ئەمەش دەبێتەهۆی زیادبوونی زیپکە و هەوکردنی پێست.
رووداو: زیپکەی ژێر پێست جیاوازییەکەی چییە لەگەڵ زیپکەی ئاسایی و رێگە چارەسەرییەکانی هەردووکیان کامانان؟
د. هۆزان کەمال: هەردوو جۆری زیپکەکە هاوشێوەی یەکن و تەنیا جیاوازی ئەوەیە کە زیپکەی ئاسایی جۆرە بەکتریایەک تێیدا گەشەدەکات بۆیە زیاتر دێتە دەرەوەی پێستەکە، بەڵام زیپکەی ژێر پێست کەمتر چەوریی تێیدا کۆدەبێتەوە و هەوکردنی کەمترە؛ هەر بۆیە زۆرجار چارەسەرەکانیان وەکو یەکن و پزیشکی پسپۆڕ دەبێت دەستنیشانی دەرمانەکە و دۆخی چارەخوازەکە بکات.
