رووداو - تەندروستی
توێژینەوەیەک لە هەرێمی کوردستان ئاشکرای دەکات، بەشێک لە جووتیارانی هەرێمی کوردستان سێ ئەوەندەی ئاستی ستاندارد بۆ سەوزە و میوەکانیان قڕکەرەکان بەکاردەهێنن، ئەمەش میوەکانیان ژەهراویدەکات.
توێژینەوەکە لە زانکۆی سەلاحەدین کراوە و دەریدەخات، ئەگەر هاونیشتمانی لە هەرێمی کوردستان تەنانەت خۆی سەوزە و میوەش بچێنیت و پارێزیی تەواویش بکات، بڕێک لە پاشماوەی دەرمانی قڕکەری ژەهراوی دەچێتە نێوجەستەی، ئەوەش بەهۆی زۆر بەکارهێنانی کە وادەکات بچێتە نێو هەوا و ئاوەوە.
شیلان عەلی، پسپۆڕی کیمیای شیکاری و نووسەری توێژینەوەکە بە رووداوی گوت، ''بڕی هەر قڕکەرێک بۆ سەوزە و میوەکان پێوانەی خۆی هەیە. کاتێک لەو پێوەرە دەردەچێت، واتە شیاو نییە بۆ خواردن''.
پسپۆڕەکە کاری لەسەر خەیار کردووە و بۆی دەرکەوتووە، لە هەر کیلۆیەک زیاتر لە سێ میلیگرام قڕکەری تێدابووە، واتە هەر کیلۆیەک لەو خەیارە زیاتر لە سێ میلیگرام ژەهری تێدایە".
شیلان عەلی دەڵێت: ''رێژەی ئاسایی دەبێت یەک میلیگرام قڕکەر بۆ هەر کیلۆگرامێک سەوزە و میوە هەبێت، تەنانەت تاوەکو سێ میلیگرامیش تاڕادەیەک ئاساییە، بەڵام لەوە زیاتر مەترسیدارە و شیاونییە بۆ خواردن''.
ئەنجامی توێژینەوە زانستییەکان تۆقێنەرن و پسپۆڕان دەڵێن، ئەگەر رێگە لە بەکارهێنانی ئەو مادانە نەگیرێت، لە داهاتوودا کاریگەریی زیانەکەیان زۆرتر و روونتر دەردەکەوێت.
ناوەندی نیشتمانیی زانیاریی قڕکەرەکان لە ئەمریکا دەڵێت، بەرکەوتن بە هیچ بڕێکی قڕکەر سەلامەت نییە و دەشێت کاریگەریی جۆراوجۆری هەبێت لەسەر تەندروستی و دەروونی مرۆڤ.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ