رووداو - تەندروستی
پسپۆڕێکی خۆراک رایدەگەیێنێت، قاوەی ئێسپرێسۆ بەراورد بە قاوەکانی دیکە کافاینی زیاترە، هەروەها دەڵێت: ئەو قاوانەی لەگەڵ چەرەسەکان تێکەڵ دەکرێن بەسوودترن.
لە بڕگەیەکی مەیدانیدا کە دکتۆر لونا خالید پشکێشی کرد، تاژان محەممەد، پسپۆڕی زانستی خۆراک ئاماژەی بە سوودە تەندروستییەکانی جۆرە جیاوازەکانی قاوە کرد و گوتی، کافایین و پۆلیفینۆڵەکان مادەی سەرەکیی نێو قاوەکانن و قاوەی ئێسپرێسۆ بەراورد بە جۆرەکانی دیکەی قاوە بەرزترین رێژەی کافاینی تێدایە.
تاژان محەممەد دەڵێت: ئەو قاوانەی پێکهاتەی سەرەکییان چەرەسەکانە بەسوودن وەکو قاوەی قەزوان و بوندوق و فستق، هەروەها دەشڵێت: ''قاوەی قەزوان بڕێکی زۆر چەوریی تێدایە و بەشێوەیەکی سنووردار بخورێتەوە''.
ئەو پسپۆڕەی خۆراک ئاماژە بە بڕی خواردنەوەی قاوەی رۆژانە دەکات و دەڵێت: رۆژانە 1 بۆ 2 کووپ قاوەی ئاسایی بخورێتەوە، بەڵام بۆ قاوەی قەزوان لە رۆژێکدا کووپێک بخورێتەوە.
تاژان محەممەد هۆشداری دەدات، راستەوخۆ دوای لەخەوهەڵسان قاوە نەخورێتەوە، بەڵکو 1 بۆ 2 کاژێر دواتر ئینجا بخورێتەوە، چونکە جەستە تووشی دڵەڕاوکێ و شڵەژان دەکات.
ئەو پسپۆڕە زیاتر روونی دەکاتەوە، دوای لەخەوهەستان رێژەی هۆرمۆنی کۆرتیزۆڵ لە جەستەدا بەرزە، ئەمەش دەبێتەهۆی بەئاگایی زیاتر و بە خواردنەوەی قاوە دەشێت کەسەکە هەست بە ناجێگیری و شڵەژانی دەروونی بکات.
لە بارەی خواردنی شیرینییەکان لەگەڵ قاوە پسپۆڕەکەی خۆراک گوتی، قاوە بەتەنیا بخورێتەوە باشترە یاخود لەگەڵ قاوە خۆراکێکی بێ شەکر یان خۆراکێکی دانەوێڵەی تەواو بخورێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ