رووداو دیجیتاڵ
زنجیرەی "Severance"ی کەناڵی Apple TV+ بە یەکێک لە باشترین بەرهەمە تەلەڤیزیۆنییەکانی ئەم دواییە دادەنرێت، کە بە شێوازێکی ناوازە تێکەڵەیەک لە درامای شوێنی کار، تەنزی رەش و نهێنیی دەروونی پێشکەش دەکات. ئەگەر تۆش یەکێکیت لە هەوادارانی ئەم زنجیرەیە و بەدوای بەرهەمی هاوشێوەدا دەگەڕێیت، ئەوا ماڵپەڕی "TV Insider" لیستێکی لە باشترین ئەو زنجیرانە ئامادە کردووە کە دەتوانن جێگەی بگرنەوە.
لێرەدا هەندێک لەو زنجیرانە دەخەینەڕوو رەنگە بەدڵت بن:
1. Silo (سایلۆ)
هەردوو زنجیرەکە جیهانێکی داخراو و پڕ لە نهێنی نیشان دەدەن، تێیدا کارەکتەرەکان بەدوای راستیی بوونی خۆیان و ئەو سیستمەدا دەگەڕێن، تێیدا دەژین. "Silo" کۆمەڵگەیەکی ژێرزەمینیی گەورە نیشان دەدات کە دانیشتووانەکەی هیچ شتێک لەبارەی جیهانی دەرەوە نازانن و یاسای توند بەسەریاندا سەپێنراوە.
2. Interview with the Vampire (چاوپێکەوتن لەگەڵ خوێنمژەکە)
باس لە پەیوەندییەکی ئاڵۆز و ژەهراوی نێوان دوو کارەکتەری سەرەکی دەکات، هاوشێوەی پەیوەندیی نێوان مارک و هێلی لە "Severance". هەردوو زنجیرەکە بە قووڵی باس لە ناسنامە، یادەوەری و کاریگەریی پەیوەندییەکان لەسەر تاک دەکەن.
3. Black Bird (باڵندەی رەش)
ئەگەر حەزت لە لایەنە دەروونی و گرژییەکەی "Severance" بووە، ئەوا "Black Bird" هەڵبژاردەیەکی نایابە. زنجیرەکە چیرۆکی زیندانییەک دەگێڕێتەوە کە دەنێردرێتە زیندانێکی دیکە بۆ ئەوەی دانپێدانان لە بکوژێکی زنجیرەیی وەربگرێت. گرژیی دەروونی و یاریی مێشک لە نێوان کارەکتەرەکاندا توخمی هاوبەشی هەردوو بەرهەمە.
4.From (لە)
ترسناک و نهێنیئامێزە باس لە شارۆچکەیەک دەکات کە هەرکەسێک بچێتە ناوی، ناتوانێت لێی دەربچێت. دانیشتووانەکەی ناچارن بەدوای نهێنیی شوێنەکەدا بگەڕێن و لەگەڵ بوونەوەری ترسناکدا رووبەڕوو ببنەوە. هاوشێوەی "Severance"، کارەکتەرەکان لە شوێنێکدا گیریان خواردووە کە یاسای سەیر و نامۆی خۆی هەیە و هەوڵی تێگەیشتن و رزگاربوون دەدەن.
5. Midnight Mass (نوێژی نیوەشەو)
ئەم زنجیرە کورتە باس لە گەڕانەوەی قەشەیەکی گەنج و کاریزمایی بۆ دوورگەیەکی بچووک و دابڕاو دەکات، کە لەگەڵ هاتنیدا زنجیرەیەک رووداوی سەرووسروشتی و پەرچووئاسا روودەدەن. لایەنی هاوبەشی لەگەڵ "Severance" بریتییە لە بوونی کەشێکی داخراو و تا رادەیەک "سەکتەئاسا" (cult-like) کە لە دەوری بیرۆکەیەک یان کەسایەتییەکی دیاریکراو (وەک Kier Eagan لە "Severance") کۆبوونەتەوە.
6. Poker Face (رووخساری پۆکەر)
لە رووی پێکهاتەوە خاڵی هاوبەشی هەیە. کارەکتەری سەرەکی، چارلی، توانایەکی سەرووسروشتی هەیە بۆ زانینی ئەوەی کەسێک درۆ دەکات، ئەمەش وای لێدەکات لە هەر شارێک رادەوەستێت، تاوانێکی کوشتن ئاشکرا بکات. هاوشێوەی هەوڵی کارمەندانی لومۆن بۆ دۆزینەوەی نهێنییەکان، چارلیش بەردەوام بەدوای راستییەوەیە لە دۆخە ئاڵۆزەکاندا.
7. Russian Doll (بووکەڵە رووسییەکە)
بە شێوەیەکی روون باس لە چەمکی دووبارەبوونەوە و گیانخواردن دەکات. کارەکتەری سەرەکی، نادیا، لە رۆژی لەدایکبوونیدا دەمرێت و پاشان زیندوو دەبێتەوە و هەمان رۆژ دووبارە و دووبارە دەژییەوە. ئەم "بازنە کاتییە" (time loop) زۆر هاوشێوەی ژیانی رۆژانەی کارمەندە "جیاکراوەکان"ی "Severance"ە، کە هەموو رۆژێک بەبێ هیچ یادەوەرییەکی رابردوو دەستپێدەکەن و لە هەوڵی شکاندنی ئەو بازنەیەدان.