رووداو دیجیتاڵ
بەرپرسی دەستەی کارگێڕیی مەکتەبی سیاسیی پارتی دیموکراتی کوردستان لەبارەی شانۆگەریی 'داستانی کوردستان' گوتی، شانۆکە "بێوێنە" بوو. دەشڵێت، "خەڵکی دهۆک و کورد بەگشتی دەبێت سەرفراز بین کە کەسانی لەم شێوەیەمان هەیە."
ئەمڕۆ شەممە 14-09-2024 فازڵ میرانی، بەرپرسی دەستەی کارگێڕیی مەکتەبی سیاسیی پارتی دیموکراتی کوردستان لەدوای بینینی شانۆگەریی "داستانی کوردستان،" کە لە هۆڵی کۆنفرانسی زانکۆی دهۆک پێشکێش کرا، رایگەیاند، "شانۆیەکی بێوێنە بوو، خەڵکی دهۆک و بەگشتی کورد، دەبێت سەرفراز بن کە ئێمە کەسانێکی لەم شێوەیەمان هەیە."
فازڵ میرانی گوتی، "دەستخۆشی لە خاوەن بیرۆکەکە، سەرپەرشتیار، ئەکتەرەکان و ئەو کەسانە دەکەم کە پاڵپشتیی دروستکردنی شانۆکەیان کردووە."
لەبارەی نێوەرۆکی شانۆگەریی "داستانی کوردستان" ئاماژەی بەوە کرد، "بەگشتی شتێکی نوێ بوو، نەک تەنیا لە دهۆک و لە کوردستان. ئەگەر دەرفەت هەبێت، لەوانەیە [سنووری پێشکێشکردنی] لە عێراقیش تێپەڕێت."
زیاتر لە ساڵێکە لەلایەن گرووپێکی 200 کەسی لە هونەرمەندانی دهۆک و کوردستان ئامادەکاری بۆ شانۆگەریى "داستانى کوردستان" دەکرێت و رۆژی 11-09-2024 بۆ یەکەمجار، بە ئامادەبوونی سەرۆک مەسعود بارزانی نمایش کرا.
لە 15 تاوەکو 17ـی مانگ نمایشی شانۆگەرییەکە دەبێتە گشتی و هەموو کەسێک دەتوانێت ئامادەی نمایشەکە بێت.
.png&w=3840&q=75)