رووداو دیجیتاڵ
بە بەشداریی شاندی ژنانی هەرێمی کوردستان، پێنجەمین
کۆڕبەندی (ئافرەتانی نێودەوڵەتی «ژنانی هەزارەی سێیەم») لە رووسیا دەستی بە کارەکانی
کرد و دوو رۆژ بەردەوام دەبێت. نوێنەری حکومەتی هەرێمی کوردستان لەو وڵاتە دەڵێ، لە
گوتاری کوردستاندا باسی گرنگیی رۆڵی ژن لە بەرگری و سیاسەتدا کرا.
کۆڕبەندەکە ئەمڕۆ چوارشەممە 18-11-2026 لە شاری
مۆسکۆی پایتەختی رووسیا دەستی پێکرد، تێیدا نوێنەری 50 وڵاتی جیهان بەشداری دەکەن،
لە هەرێمی کوردستان شاندێک کە پێکهاتوون لە د. خانزاد ئەحمەد، ئەمینداری گشتیی ئەنجوومەنی
باڵای خانمان و گەشەپێدان لە حکومەتی هەرێمی کوردستان، زیبا تەها، سکرتێری یەکێتیی
ئافرەتانی کوردستان بە هاوئاهەنگی لەگەڵ د. دانەر ئەبوبەکر، بەرپرسی نوێنەرایەتیی
حکومەتی هەرێمی کوردستان لە رووسیا و مامۆستا سێدا مۆسۆیان، بەرپرسی ناوەندی رەوەندی
کوردستانیی ئافرەتان لە ڕووسیا بەشداری دەکەن.
د. دانەر ئەبوبەکر بە تۆڕی میدیایی رووداوی
گوت: "بەشداربوونی شاندی هەرێمی کوردستان لەم کۆڕبەندەدا زۆر گرنگە، چونکە لە
نزیکەوە جیا لە بەشداربوون، دیداری تایبەتیان لەگەڵ شاندی ژنان و بەرپرسانی وڵاتانی
بەشداربوو دەبێت".
نوێنەری حکومەتی هەرێمی کوردستان لە رووسیا گوتی:
"وەزارەتی دەرەوەی رووسیا بایەخی تایبەتی داوە بە شاندی هەرێمی کوردستان و خۆی
هاوئاهەنگی بۆ هاتنیان کردووە و ڤیزەی بۆ دابینکردوون، ئەوەش یەکەم جارە شاندێکی
ژنان بەفەرمی لە هەرێمی کوردستانەوە بێنە رووسیا".
شاندی هەرێمی کوردستان بە ئاڵای کوردستانەوە بەشدارییان
کردووە، د. دانەر ئەبوبەکر ئاماژەی بەوە کرد: "شاندی وڵاتان بەخێرهاتنی شاندی
کوردستانیان کردووە و شاندی هەرێمی کوردستان گوتاری تایبەتی هەبوو، هەروەها سبەی دیداری
تایبەت لە پەراوێزی کۆڕبەندەکەدا بۆ شاندی هەرێمی کوردستان و شاندی وڵاتان رێکدەخرێت".
شاندی هەرێمی کوردستان لە کۆڕبەندەکەدا پێشانگەیەکی
وێنەکێشانی بۆ تابلۆکانی نیگارکێشی لاوی کوردانی سۆڤیەت، نۆریک مۆسۆیان کردەوە، هەروەها
گوتاری هەرێمی کوردستان لەلایەن د. خانزاد ئەحمەدەوە پێشکەش کرا و باسی لە رۆڵی
گرنگی ژنانی کورد لە ژیانی کۆمەڵایەتی، بەرگری، سیاسی و ئابووری لە کۆمەڵگەی کوردیدا
کرد.



