رووداو دیجیتاڵ
مامۆستایەکی زانکۆی ئەمریکی لە واشنتن دەڵێ، ئەگەر دیموکراتەکان بتوانن لە هەڵبژاردنی نیوەخول زۆرینەی ئەنجوومەنی نوێنەران بەدەستبهێنن، لێپێچینەوەی ورد لە سیاسەتی دەرەوەی ئیدارەی دۆناڵد ترەمپ دەکەن، بەتایبەتی لەبارەی چۆنیەتی هەڵگیرسانی شەڕی ئێران.
گریگۆری ئەفتەندەلیان، مامۆستای زانکۆی ئەمریکی لە واشنتن دەڵێ، لە ئەگەری سەرکەوتنی دیموکراتەکان، ئەندامانیان لە ئەنجوومەنەکانی پیران و نوێنەران دەسەڵاتی بانگهێشتکردنی بەرپرسانیان دەبێت و دەتوانن لە رێگەیەوە بەرپرسانی ئیدارەی ترەمپ ناچار بکەن بۆ لێپرسینەوە لە کۆنگرێس ئامادە بن.
ئەفتەندەلیان دەڵێ، کۆنگرێس مافی تەرخانکردنی بودجەی هەیە، بۆیە ئەگەر دیموکراتەکان بیانەوێ، دەتوانن بڕیاری راگرتنی بودجەی شەڕی ئێران بدەن و چیدیکە پارە بۆ ئەو مەبەستە تەرخان نەکەن.
سەبارەت بە ئەنجوومەنی پیران، ئەفتەندەلیان گوتی، "تاوەکو ئێستا ئەنجام یەکلایی نەبووەتەوە و نازانرێت کۆمارییەکان دەسەڵاتی خۆیان دەهێڵنەوە یان دیموکراتەکان دەیبەنەوە."
ئەو مامۆستایە کە پێشتر وەک شرۆڤەکاری رۆژهەڵاتی نێوەڕاست لە وەزارەتی دەرەوە و بەرگریی ئەمریکا کاری کردووە، ئاماژە بەوەش دەکات کە ئەگەر پارتەکەی ترەمپ لە هەڵبژاردنی نیوەخولدا شکست بهێنێت، وڵاتانی جیهان کەمتر پابەندی سیاسەتەکانی دەبن، چونکە وەک سەرۆکێکی لاوازتر دەیبینن.
لەبارەی کاریگەرییەکانی لەسەر کورد، مامۆستاکەی زانکۆی ئەمریکی دەڵێ: "قسەکردن لەسەر ئەوەی سیاسەتی ئەمریکا بەرامبەر کورد چی بەسەر دێت، کارێکی قورسە." بەڵام "لەنێو کۆنگرێسدا هاوسۆزییەکی زیاتر بۆ کورد هەیە بەراورد بە ئیدارەی ترەمپ."
قسەکانی ئەو مامۆستایە ئەمڕۆ سێشەممە لەکاتی بەشداریکردنی بوو لە بەرنامەی (رێگەی کۆنگرێس) کە دیار کوردە، بەڕێوەبەری نووسینگەی رووداو لە واشنتن پێشکێشیکرد.
