رووداو - دیجیتاڵ
لە 6ی ئۆکتۆبەری 2026دا، کۆمپانیای پاراماونت سکایدانس کۆتایی بە پڕۆسەی کڕینی کۆمپانیای وارنەر برۆس دیسکەڤەری بە بەهای 110 ملیار دۆلار هێنا.
بە تەواوبوونی ئەم مامەڵەیە، قەوارەیەکی گەورەی میدیایی و کاتبەسەربردن هاتە کایەوە کە کۆنتڕۆڵی ژمارەیەک لە گرنگترین دامەزراوەکانی هەواڵ و بەرهەمهێنانی جیهانی دەکات و بەڕێوەبەرایەتیی گشتیی کۆمپانیا نوێیەکە کەوتە دەست دێڤید ئەلیسۆن.
ئەم یەکگرتنە چەندین ستۆدیۆی ناسراوی وەک (Mission: Impossible)، (Harry Potter) و (DC Studios) لە ژێر یەک چەتردا کۆ دەکاتەوە؛ هەروەها کەناڵە تەلەڤزیۆنییە گەورەکان و پلاتفۆڕمەکانی ستریمینگ لەوانە (CBS)، (CNN)، (Paramount+) و (HBO Max) دەبنە بەشێک لەم کۆمپانیا نوێیە.
رووبەڕووبوونەوەی پێشبڕکێکارە گەورەکان
ئەلیسۆن لە نامەیەکدا بۆ کارمەندانی کۆمپانیاکە جەختی لەسەر ئەوە کردەوە، ئامانج لەم هەنگاوە تەنیا گەورەکردنی قەبارەی کۆمپانیا نییە، بەڵکو بەهێزکردنی تواناکانیەتی بۆ رووبەڕووبوونەوەی کێبڕکێکارە سەرەکییەکانی بازاڕە.
کۆمپانیای سکایدانسی نوێ تەنیا لەگەڵ نێتفڵیکس و دیسنی کێبڕکێ ناکات، بەڵکو رووبەڕووی زەبەلاحە تەکنەلۆژییەکانیش دەبێتەوە لەوانە ئەپڵ، مێتا و ئەمازۆن.
ئەلیسۆن ئاماژەی بەوە دا، هەندێک لە کۆمپانیا نەریتییەکانی میدیا لە گۆڕانکاری و نوێگەری دواکەوتن و رێگەیان دا پلاتفۆڕمەکانی وەک نێتفڵیکس و ئەمازۆن پڕایم ڤیدیۆ پشکێکی گەورەی بازاڕەکە بگرنە دەست.
لە گۆڕانکارییەکی دارایی و بازاڕیشدا، پشکەکانی کۆمپانیای یەکگرتوو لە 6ی ئۆکتۆبەردا لە "نیسداک"ـەوە گوازراونەتەوە بۆ بۆرسەی نیویۆرک (NYSE) تاوەکو بە هێمای بازرگانیی (SKYD) مامەڵەیان پێوە بکرێت.
پەیوەندی لەگەڵ دۆناڵد ترەمپ و داهاتووی CNN
دۆناڵد ترەمپ، سەرۆکی ئەمریکا، لە 6ی ئۆکتۆبەردا پشتیوانیی خۆی بۆ ئەم یەکگرتنە دەربڕی و رایگەیاند، ئەوە دەبێتە "کۆمپانیایەکی گەورە و یەکگرتنێکی ناوازە".
سەرەڕای نیگەرانیی هەندێک لە یاسادانەرانی ئەمریکا سەبارەت بە کاریگەریی بەڕێوەبەرە نوێیەکان لەسەر سیاسەتی دەزگا هەواڵییەکان، بەڵام لە چوارچێوەی رێککەوتنەکەدا بڕیار درا بۆردێکی سەربەخۆی سەرنووسەری بۆ چاودێریکردنی (CNN) و (CBS) دابمەزرێت. مارک تۆمسۆن، سەرۆکی CNN، و باری وایس، سەرنووسەری گشتیی CBS News، لە پۆستەکانیان بەردەوام دەبن و راپۆرت بۆ دێڤید ئەلیسۆن و یۆنن کرایز، هاوبەڕێوەبەری گشتیی کۆمپانیاکە، بەرز دەکەنەوە.
مێژوویەکی خێرا بەرەو لووتکە
کۆمپانیای سکایدانس لە ساڵی 2010 لەلایەن دێڤید ئەلیسۆنەوە دامەزرا، کە کوڕی لاری ئەلیسۆن، یەکێک لە دامەزرێنەرانی کۆمپانیای ئۆراکڵە. کۆمپانیاکە سەرەتا بە پشتیوانیی دارایی و هاوبەشی لەگەڵ پاراماونت لە بەرهەمهێنانی فیلمی سەرکەوتووی (Top Gun: Maverick) ناوبانگی پەیدا کرد، و ئێستاش دوای یەکگرتنی لەگەڵ پاراماونت لە ساڵی رابردوو، توانی کێبڕکێی نێتفڵیکس بکات و وارنەر برۆس بەدەست بهێنێت.
خاوەن پشکەکانی وارنەر برۆس بڕی 41.9 ملیۆن دۆلاری زیاتریان وەک خەڵاتی بەستنی گرێبەست وەرگرتووە، کە لە کۆتایی مانگی ئەیلوولەوە تاوەکو کاتی تەواوبوونی مامەڵەکە بەپێی بەڵگەنامەیەکی فەرمی خەرج کراوە.
