رووداو دیجیتاڵ
نەتەوە یەکگرتووەکان لە راپۆرتێکی نوێدا ئاشکرای دەکات کە نزیکەی 220 ملیۆن کۆچبەر و ئەندامی دیاسپۆرا لە سەرانسەری جیهان، ساڵانە یارمەتیی دارایی زیاتر لە 1.1 ملیار کەس لە ئەندامانی خێزانەکانیان دەکەن لە وڵاتانی کەم و مامناوەندداهات.
رۆژی دووشەممە، سندوقی دارایی پارەی کۆچبەران لە نەتەوە یەکگرتووەکان راپۆرتێکی تێروتەسەلی لەبارەی ئەو پارانەی کۆچبەران بۆ کەسوکاریانی دەنێرنەوە، بڵاوکردەوە.
پێدرۆ دی ڤاسکۆنسێلۆس، بەڕێوەبەری سندوقەکە، رایگەیاند، "کۆچبەران لە سەرانسەری جیهان نزیکەی 729 ملیار دۆلاریان بۆ خێزانەکانیان ناردووە."
بەپێی راپۆرتەکە، ئەو بڕە پارەیەی کۆچبەران ئەمڕۆ بۆ کەسوکاریان دەینێرنەوە، بە بەراورد بە 10 ساڵ لەمەوبەر دوو هێندە زیادی کردووە. هەروەها، بڕەکە زیاترە لە کۆی ئەو پارەیەی هەموو رێکخراوە خێرخوازییەکانی جیهان پێکەوە دابینی دەکەن. بۆ نموونە، لە ساڵی 2025 کۆی کۆمەکی گەشەپێدانی دەرەکی 174 ملیار دۆلار بووە، کە دەکاتە کەمتر لە چارەگی ئەو پارەیەی کۆچبەران ناردوویانەتەوە.
لە وەڵامی پرسیارێکی رووداودا سەبارەت بەوەی ئایا کۆچکردن هەمیشە بە "رۆیشتنی مێشکەکان" دادەنرێت یان نا، پێدرۆ دی ڤاسکۆنسێلۆس گوتی، "ئەوەی ئێمە هەوڵی بۆ دەدەین کەمکردنەوەی ئەو کاریگەرییانەیە کە خەڵک پاڵ پێوە دەنێن بۆ کۆچکردن. بۆ نموونە، سەیری ئەوە دەکەین ئایا دەرفەتەکانی وەک ناردنەوەی پارە، قەرز، پاشەکەوت و وەبەرهێنان دەتوانن کۆچکردن بکەنە بژاردە، نەک پێویستی."
راپۆرتەکە ئاماژە بەوە دەکات کە بڕی ئەو پارەیەی عێراقییەکان لە دەرەوە بۆ وڵاتەکەیان ناردوویانەتەوە، لە ساڵی 2025 بە رێژەی 29% کەمیکردووە بە بەراورد بە 10 ساڵ لەمەوبەر.
بەڵام لە هەندێک وڵاتی دیکەدا، ئەو پارەیەی کۆچبەران دەینێرنەوە زیاتر لە نیوەی ئابووریی وڵاتەکە پێکدێنێت. بۆ نموونە، لە تاجیکستان، بڕەکە یەکسانە بە 58%ی کۆی ئابووریی وڵات، واتە لە هەر 10 دۆلارێک کە لەو وڵاتەدا هەیە، نزیکەی شەش دۆلاری لەلایەن ئەو هاونیشتمانیانەوە دابینکراوە کە لە دەرەوەی وڵات دەژین.
لە وڵاتانی وەک سودان، کە بەهۆی شەڕ و ناسەقامگیرییەوە لە دۆخێکی "زۆر لەرزۆک"دان، نزیکەی یەک لەسەر سێی تەواوی ئەو پارەیەی بۆ گەشەپێدان دێت، لە رێگەی کۆچبەرانەوەیە.
کارل سکاو، بەڕێوەبەری جێبەجێکاری وەکالەتی بەرنامەی خۆراکی جیهانی (WFP)، هۆشداریی دا و گوتی، "سودان هێشتا لە گەورەترین قەیرانی برسێتی و ئاوارەبوونی جیهاندایە و 20 ملیۆن کەس رووبەڕووی برسێتیی توند بوونەتەوە."
