رووداو دیجیتاڵ
بەپێی ئەنجامی بەرایی هەڵبژاردنی گشتی سوێد، بەرەی چەپ، بە جیاوازییەکی کەم پێش بەرەی راستڕۆی سوێد کەوتوون و بوونەتە براوەی هەڵبژاردنەکە. پارتی پارتی سۆسیال دیموکرات، زیاتر لە 27٪ی دەنگەکان و 99 کورسی پەرلەمانی بە دەستهێناوە. هەرچی پارتی دیموکراتەکانی سوێدە، بەراورد بە هەڵبژاردنی رابردوو دەنگەکانی کەمی کردووە و 17.7٪ی دەنگەکان و 63 کورسی بە دەستهێناوە.
بەپێی ئەم ئەنجامە بەراییانە، لە ئەنجامی جیاکردنەوەی 5 ملیۆن و 500 هەزار دەنگ، رێژەی دەنگی پارتەکان بەم شێوەیەی لێهاتووە:
پارتی سۆسیال دیموکرات: 27.9٪ (بەراورد بە ساڵی 2022، 2.2٪ کەمی کردووە)
پارتی مۆدێرات - پارێزگاران: 19.8٪ (0.7٪ زیادی کردووە)
پارتی دیموکراتەکانی سوێد: 17.7٪ (2.8٪ کەمی کردووە)
پارتی چەپ: 8.1٪ (1.4٪ زیادی کردووە)
پارتی نێوەڕاست: 7.1٪ (0.5٪ زیادی کردووە)
پارتی کریستیان دیموکرات: 6.2٪ (0.9٪ زیادی کردووە)
پارتی سەوز: 6.1٪ (1٪ زیادی کردووە)
پارتی لیبراڵەکان: 5.4٪ (0.8٪ زیادی کردووە)
پارتەکانی دیکە: 1.6٪
هەر بەپێی ئەنجامە بەراییەکان 349 کورسییەکەی پەرلەمان بەمشێوەیە دابەش بوون:
پارتی سۆشیال دیموکرات: 99 کورسی
پارتی دیموکراتەکانی سوێد: 63 کورسی
پارتی مۆدێرات: 70 کورسی
پارتی چەپ: 29 کورسی
پارتی نێوەڕاست: 25 کورسی
پارتی سەوز: 22 کورسی
پارتی کریستیان دیموکرات: 22 کورسی
پارتی لیبراڵ: 19 کورسی
بەپێی سیستمی سیاسیی سوێد و هاوپەیمانێتییەکانی ئەم هەڵبژاردنە، پارتەکان بەسەر دوو بەرەی سەرەکی (راستڕۆ و چەپڕۆ)ـدا دابەش بوون.
یەکەم: بەرەی راستڕۆ (دەسەڵاتدارانی ئێستا)
ئەم بەرەیە لە چوار پارت پێکدێت. سێ پارتیان کابینەی حکومەتی ئێستایان پێکهێناوە، پارتی چوارەمیش لە دەرەوەی کابینەکە پشتگیرییان دەکات بۆ ئەوەی زۆرینەی پەرلەمان مسۆگەر بکەن:
پارتی مۆدێرات: پارتی سەرۆکوەزیرانی ئێستایە (ئولف کریستەرسۆن) و سەرکردایەتیی حکومەتی راستڕۆ دەکات.
پارتی کریستیان دیموکرات: پارتێکی راستڕۆی پارێزگارە و لە کابینەی حکومەتی ئێستا بەشدارە.
پارتی لیبراڵەکان: پارتێکی راستڕۆی میانڕۆیە و لە کابینەی حکومەتی ئێستا بەشدارە.
پارتی دیموکراتەکانی سوێد: پارتێکی راستڕۆی تووندڕۆیە. لەناو کابینەی وەزاریی ئێستادا نین، بەڵام لە پەرلەمانەوە پشتگیریی حکومەتەکەی کریستەرسۆن دەکەن.
دووەم: بەرەی چەپڕۆ (ئۆپۆزیسیۆنی ئێستا)
ئەم بەرەیە لە چوار پارت پێکدێت بە سەرۆکایەتیی ماگدالینا ئەندەرسۆن، کە دەیانەوێت حکومەتی نوێ پێکبهێنن:
پارتی سۆسیال دیموکرات: گەورەترین پارتی سوێدە و سەرکردایەتیی بەرەی چەپ دەکات (پێشتر فەرمانڕەوای سوێد بوون).
پارتی چەپ: پارتێکی چەپڕۆی سۆسیالیستە و بەشێکی سەرەکییە لەم بەرەیە.
پارتی سەوز: پارتێکی چەپڕۆیە و کارنامەکەی زیاتر لەسەر پاراستنی ژینگە و کەشوهەوایە.
پارتی نێوەڕاست: هەرچەندە لە رووی ئایدۆلۆژییەوە پارتێکی میانڕۆیە، بەڵام لەم ساڵانەی دواییدا چووەتە پاڵ بەرەی چەپ بۆ رێگریکردن لە بەهێزبوونی راستڕۆ تووندڕەوەکان
