رووداو دیجیتاڵ
دەستەی بەڕێوەبەرانی ئاژانسی نێودەوڵەتیی وزەی ئەتۆم لە بڕیارێکی دیپلۆماسیدا، بەهۆی "پابەندنەبوونی" ئێران لە دۆسیە ئەتۆمییەکەی، رەوانەکردنی دۆسییەکەی بۆ ئەنجوومەنی ئاسایشی رێکخراوی نەتەوە یەکگرتووەکان پەسەند کرد، ئەمەش بە ئامانجی دروستکردنی گوشاری زیاتر لەسەر ئێران.
بەپێی زانیارییەکانی دوو دیپلۆماتکار بۆ ئاژانسی فرانس پرێس، پڕۆژەبڕیارەکە بە 23 دەنگی بەڵێ، سێ دەنگی نەخێر و هەشت دەنگی بێلایەن پەسەند کراوە. لەنێو بەشداربوواندا، هەریەکە لە رووسیا، چین و نەیجەر دەنگی دژ و نەرێنییان داوە.
پەرچەکرداری تاران: بڕیارەکە سیاسییە و ئەمریکا و ئیسرائیل بەرپرسن
لە بەرامبەر ئەم بڕیارەدا، نوێنەرایەتیی هەمیشەیی ئێران لە رێکخراوە نێودەوڵەتییەکان لە ڤیەنا راگەیێندراوێکی تووندی بڵاوکردەوە و ئاماژەی بەوە کرد، ئەم رێکارە سیاسییە و دەبێتە هۆی لاوازبوون و هەرەسهێنانی تەواوەتیی سیستمی رێگریکردن لە بڵاوبوونەوەی چەکی ئەتۆمی.
نوێنەرایەتییەکەی ئێران رایگەیاندووە، دۆخی ئێستا ئەنجامی راستەوخۆی "پەلامار و دەستدرێژییە تاوانکارییەکانی رژێمی ئەمەریکا و ئیسرائیلە".
تاران ئاماژەی بەوە کردووە، ئامانجی ئیدارەی ئەمەریکا بۆ زۆرلێکردنی ئێران بۆ خۆبەدەستەوەدان و بڕینی نەوتەکەی هەرگیز نایەتە دی. هەروەها ئاماژەی بەوە کردووە، بەکارهێنانی هێز و شەڕ لەلایەن ئەمەریکا و هاوپەیمانەکانیەوە لە دوو ساڵی رابردوودا نەبووەتە هۆی بەدیهێنانی ئەو ئامانجەی واشنتن.
نوێنەرایەتیی ئێران دەڵێت، واشنتن و هاوپەیمانەکانی ناتوانن شکستەکانیان بە پەسەندکردنی "بڕیارنامەی لایەنگرانە" لە رێگەی ئاژانسی وزەی ئەتۆمەوە داپۆشن.
تاران ئاماژەی بەوە داوە، لە رابردوودا ئەم بڕیارنامانە باسیان لە "چارەسەری دیپلۆماسی" دەکرد، بەڵام ئەمریکا راستەوخۆ پەنای بۆ هێز برد و بنکە ئەتۆمییە ئاشتیخوازەکانی بۆردومان کرد؛ هەروەها ئاماژەی بە پێشێلکردنی یاسا نێودەوڵەتییەکان، یاسای مرۆیی و پەیماننامەی نەتەوە یەکگرتووەکان کردووە کە بووەتە هۆی کوژرانی هەزاران مەدەنی، لەنێویاندا 168 منداڵ لە قوتابخانەیەکی سەرەتایی و میوانانی ئاهەنگێکی هاوسەرگیری.
