.jpg&w=3840&q=75)
رووداو دیجیتاڵ
کلاوس مایکل کیونە، دەوڵەمەندترین پیاوی ئەڵمانیا و پاشای لۆجستیی جیهان، لە تەمەنی 89 ساڵیدا کۆچی دوایی کرد و بەهۆی ئەوەی هیچ میراتگرێکی نەبوو، تەواوی سامانە 49 ملیار دۆلارییەکەی بۆ دەزگایەکی خێرخوازی جێهێشت.
کۆمپانیای (Kuehne + Nagel) بۆ گواستنەوە و لۆجستیی نێودەوڵەتی، کۆچی دوایی کلاوس مایکل کیونەی لە شاری شیندێلێگی لە وڵاتی سویسرا راگەیاند. کیونە کە نەوەی یەکێک لە دامەزرێنەرانی کۆمپانیاکە بوو، توانی کارە رەسەنەکەی خێزانەکەی لە کۆمپانیایەکی ناوخۆییەوە بگۆڕێت بۆ یەکێک لە گەورەترین ئیمپراتۆریەتە لۆجستییەکانی جیهان و سامانێکی یەکجار زۆر کۆبکاتەوە کە بەپێی نوێترین خەمڵاندنەکان لەنێوان 44 بۆ 49 ملیار دۆلاردایە.
سامانێکی بێ میراتگر
بەهۆی ئەوەی کلاوس مایکل کیونە و کریستینی هاوژینی هیچ منداڵیان نەبوو، تەواوی سامانەکەی بەپێی پلانێکی پێشوەختە دەدرێتە دەزگای (کیونە) (Kuehne Foundation). ئەم دەزگایە کە بنکەکەی لە سویسرا و ئەڵمانیایە، نزیکەی 50 ساڵ لەمەوبەر لەلایەن کیونە و دایک و باوکییەوە دامەزراوە.
بەم هەنگاوە، دەزگاکە دەبێتە یەکێک لە دەوڵەمەندترین رێکخراوە خێرخوازییەکانی کیشوەری ئەورووپا و پارەکەی بۆ پشتگیریکردنی توێژینەوە پزیشکییەکان، پرۆژەکانی تایبەت بە کەشوهەوا، پەروەردەی لۆجستی و چالاکییە کولتوورییەکان تەرخان دەکرێت.
ئەم میلیاردێرە ئەڵمانییە لە کانتۆنی (شویتس) لە سویسرا نیشتەجێ بوو، کە یەکێکە لەو ناوچانەی هیچ باجێکی لەسەر میرات تێدا نییە؛ ئەمەش وایکرد تەواوی سەرمایەکەی بە شێوەیەکی دەستلێنەدراو و بەبێ کەمکردنەوە بۆ دەزگای کیونە بگوازرێتەوە.
ئیمپراتۆریەتێکی جیهانی لە دەستی خێرخوازیدا
کلاوس مایکل کیونە تەنیا لە کەرتی لۆجستی و گواستنەوەی باردا پیاوی کاری سەرەکی نەبوو، بەڵکو خاوەنی پشکی گەورە و یەکلاکەرەوە بوو لە چەندین دامەزراوەی ستراتیژی:
Kuehne + Nagel: خاوەنی زۆرینەی پشکەکان بوو لەم کۆمپانیا جیهانییە.
Lufthansa: خاوەنی 20٪ـی مافی دەنگدان بوو لە گرووپی فڕۆکەوانیی نیشتمانیی ئەڵمانیا.
Hapag-Lloyd: یەکێک بوو لە پشکدارە سەرەکییەکان و لە ساڵی 2008دا بە هاوکاریی وەبەرهێنەرانی دیکە کۆمپانیاکەی لە هەڵوەشانەوە رزگار کرد.
Brenntag: پشکی گەورەی لەم گرووپە بازرگانییە کیمیاییەدا هەبوو.
Flix: وەبەرهێنەرێکی سەرەکی بوو لەم کۆمپانیایەی گواستنەوەی پاس و شەمەندەفەر.
هەرچەندە ئێستا خاوەندارێتیی ئیمپراتۆریەتەکەی کیونە بۆ دەزگا خێرخوازییەکەی دەگوازرێتەوە، بەڵام بڕیارە هەموو کۆمپانیاکانی لەژێر دەستی کارگێڕیی ئێستایان و بە سەرپەرشتیی ئەنجوومەنی ئەمیندارانی دەزگاکە، بەردەوام بن لە چالاکییەکانیان تاوەکو سەقامگیریی بازاڕی لۆجستیی جیهانی تێکنەچێت.
