رووداو دیجیتاڵ
تیمەکانی فریاگوزاری لە نیپاڵ و چین لە هەوڵێکی چڕدان بۆ دۆزینەوەی هەزاران کەس کە بێسەروشوێنن، ئەوەش دوای تێپەڕبوونی سێ رۆژ بەسەر لافاوێکی وێرانکەر ناوچەکانی هیمالایای گرتەوە و چەندین گوندی بە تەواوی راماڵی.
بەپێی دوایین ئامارە فەرمییەکان، ژمارەی بێسەروشوێن بووان بۆ زیاتر لە دوو هەزار و 400 کەس بەرزبووەتەوە. تیمەکانی فریاگوزاری رایانگەیاندووە، تاوەکو ئێستا تەرمی 586 کەسیان دۆزیوەتەوە، کە هەندێکیان لافاوەکە تاوەکو ناو خاکی هیندستانی بردوون.
بێسەروشوێن بوونی 933 کرێکاری کەرتی وزە
دەستەی رووبەڕووبوونەوەی کارەساتەکانی نیپاڵ رایگەیاند، ناوی 933 کرێکاری پڕۆژەکانی کارەبای ئاویی بۆ لیستی بێسەروشوێنبووان زیاد کراوە. ئەم لیستە پێشتر ناوی سەدان گەشتیار و زیارەتکاری تێدابوو کە بۆ سەر کێوی کەیلاش لە تبت گەشتیان کردبوو.
رێکخراوی خاچی سوور هۆشداری دەدات کە پاشماوەی دەروونی ئەم کارەساتە "یەکجار گەورەیە" و مەزەندە دەکرێت 93 هەزار کەس بەهۆیەوە زیانیان بەرکەوتبێت. تیمەکان لە کێبڕکێدان لەگەڵ کاتدا، چونکە لە ناوچە لێقەوماوەکاندا خواردن و ئاوی پاک بەرەو نەمان دەچێت.
مەترسیی نوێ و پەککەوتنی ئۆپەراسیۆنەکان
پڕۆسەی گەڕان بەدوای بێسەروشوێنەکاندا بەهۆی ترسی روودانی لافاوی نوێوە ئاڵۆز بووە. پۆلیسی نیپاڵ داوای لە هەموو تیمەکانی فریاگوزاری کردووە "دەستبەجێ ناوچەکە چۆڵ بکەن" و بەرەو شوێنی سەلامەت بڕۆن، چونکە زانیارییان پێگەیشتووە کە بەنداوێکی ئاو لە دیوی تبت دووبارە تەقیوەتەوە.
لە دیوی چینیش، حکومەتی ئەو وڵاتە ئۆپەراسیۆنەکانی رزگارکردنی لە ناوچەی گیرۆنگ بەهۆی مەترسیی لافاوەوە راگرت.
ئامارەکان بەپێی وڵاتان:
نیپاڵ: 579 کەس گیانیان لەدەستداوە و 924ی دیکەش بێسەروشووێن بوون (کە 517یان گەشتیاری بیانیین).
تبت (چین): حەوت کەس گیانیان لەدەستداوە و 554 کەسی دیکەش ببێسەروشووێن بوون.
هیندستان: حەوت تەرم دۆزراونەتەوە لەو رووبارانەی لە نیپاڵەوە دەڕژێنە وڵاتەکەوە.
ئەم کارەساتە سروشتییە بە یەکێک لە گەورەترین و کوشندەترین رووداوەکانی ناوچەی هیمالایا لە چەند ساڵی رابردوودا دادەنرێت، کە تێیدا تێکەڵەیەک لە هەرەسی سەهۆڵ، بەرد و قوڕ ژێرخانی ئابووری و ژیانی هەزاران مرۆڤی وێران کردووە.
