رووداو دیجیتاڵ
نەتەوە یەکگرتووەکان رۆژی دووشەممە رایگەیاند، لە ساڵی 2025دا 350 کارمەندی فریاگوزاری لە سەرتاسەری جیهان کوژراون، کە زۆرینەیان لە غەززە و سوودان بوون. نەتەوە یەکگرتووەکان هێرشکردنە سەر ئەوان بە کارێکی "قبووڵنەکراو" وەسف کرد.
هەرچەندە ئەم ئامارە کەمترە لە ساڵی 2024 کە تێیدا 377 کارمەند کوژرابوون، بەڵام هێشتا مەترسییەکان لە ئاستێکی بەرزدان. نووسینگەی رێکخستنی کاروباری مرۆیی نەتەوە یەکگرتووەکان لە راگەیێندراوێکدا بە بۆنەی "رۆژی جیهانیی مرۆڤایەتی" ئەم ئامارانەی بڵاوکردەوە.
غەززە و سوودان؛ مەترسیدارترین شوێنەکان
بەپێی راپۆرتەکە، لە کەرتی غەززە 186 کارمەندی فریاگوزاری کوژراون، کە بۆ سێیەم ساڵە لەسەریەک وەک مەترسیدارترین شوێن بۆ کارمەندانی مرۆیی دەمێنێتەوە. دوای ئەویش سوودان دێت کە تێیدا 71 کارمەند گیانیان لەدەستداوە.
تۆم فلێچەر، جێگری سکرتێری گشتیی نەتەوە یەکگرتووەکان بۆ کاروباری مرۆیی گوتی: "لە ماوەی تەنیا سێ ساڵدا زیاتر لە هەزار کارمەندی فریاگوزاری کوژراون، ئەمە بە تەواوی قبووڵنەکراوە. دەبێت دەوڵەتەکان یاسا نێودەوڵەتییەکان پەیڕەو بکەن و هەموو ئامرازێک بۆ پاراستنی هاوکارەکانمان بەکاربهێنن. پێویستە سزای راستەقینە بۆ ئەوانە هەبێت کە یاساکان دەشکێنن."
ئامارەکانی ساڵی 2026 و مەترسیی درۆنەکان
راپۆرتەکە ئاماژەی بەوەش کردووە کە لە سەرەتای ساڵی 2026ەوە تاوەکو ئێستا، 82 کارمەندی دیکەی فریاگوزاری کوژراون، 97 کەس بریندار بوون و 39 کەسیش رفێندراون.
نەتەوە یەکگرتووەکان نیگەرانیی خۆی لە زیادبوونی بەکارهێنانی "درۆنە سەربازییەکان" دەربڕی، کە بوونەتە هۆی کوشتارێکی زۆر. لە سوودان، درۆنە سەربازییەکان بەرپرس بوون لە 80٪ی گیانلەدەستدانی مەدەنییەکان لە چوار مانگی یەکەمی ئەمساڵدا، بەتایبەت کاتێک بازاڕ و بنکە تەندروستییەکانیان پێکاوە. هەروەها ئاماژە بە زیانەکانی درۆن لە جەنگی رووسیا و ئۆکرانیاش کراوە.
فلێچەر لە کۆتاییدا گوتی: "درۆنە جەنگییەکان بوونەتە دەموچاوە نوێیەکەی مەترسییەکی کۆن: لەناوبردنی مەبەستدارانە یان بێباکانەی ژیانی مەدەنییەکان."
