رووداو دیجیتاڵ
بەریتانیا رایگەیاند سوپای وڵاتەکەی ئامادەیە بۆ بەرپەرچدانەوەی هەر هێرشێکی ئێران. ئەمەش دوای ئەوە دێت کە سوپای پاسداران هۆشداری دابووە لەندەن رێگە بە فڕۆکە بۆمبهاوێژەکانی ئەمریکا نەدات بنکە سەربازییەکانی بەریتانیا بەکاربهێنن.
سوپای پاسدارانی ئێران لە راگەیێندراوێکدا ئاماژەی بەوە کردووە، ئەمریکا لە بنکەی (فەیرفۆرد) لە باشووری رۆژئاوای ئینگلتەراوە هێرشی کردووەتە سەر ئێران. تاران هۆشداری دا کە هەر بنکەیەک بۆ هێرشکردنە سەر خاکەکەی بەکاربهێندرێت، وەک "ئامانجێکی رەوا" سەیر دەکرێت.
گوتەبێژێکی حکومەتی بەریتانیا رایگەیاند: "هێزە چەکدارەکانمان ئامادەن بۆ پاراستنی بەریتانیا لە هەر جۆرە هێرشێک، چ لە ناوخۆی خاکەکەمان بێت یان لە دەرەوە." ئاماژەی بەوەش کرد هێزی دەریایی، وشکانی و ئاسمانیی وڵاتەکەیان بە هاوئاهەنگی لەگەڵ هاوپەیمانەکانی ناتۆ، سیستمێکی بەرگریی ئاسمانیی پێشکەوتوویان بۆ پاراستنی ئاسمانی بەریتانیا کارا کردووە.
ئاندی بێرنەم، سەرۆکوەزیرانی نوێی بەریتانیا، هەفتەی رابردوو رێککەوتنی لەگەڵ واشنتن نوێ کردەوە کە رێگە بە ئەمریکا دەدات بنکەکانی بەریتانیا بۆ "بەرگری" بەکاربهێنێت، بەتایبەتی بۆ لێدانی ئەو بنکە مووشەکییانەی ئێران کە هێرش دەکەنە سەر کەشتییەکان لە تەنگەی هورمز. بەگوێرەی راپۆرتە هەواڵییەکان، ئێران پێشتر لە مانگی ئاداردا دوو مووشەکی بالیستیی ئاراستەی بنکەی (دیێگۆ گارسیا) کردووە.
دەزگە ئەمنییەکانی بەریتانیا دەڵێن تەنیا پار، رێگرییان لە 20 پلانی کوشندەی ئێران کردووە کە ئامانجیان کەسایەتییە سیاسییەکانی ناو بەریتانیا بووە.
جەنگی نێوان ئەمریکا و ئێران لە 28-02-2026 دەستیپێکرد، هەرچەندە یاداشتێکی لێکتێگەیشتن لە نێوانیان واژۆکرا بۆ راگرتنی شەڕەکە، بەڵام دوای هێرشی ئێران بۆ سەر کەشتییەکان، ئەمریکا دەستی بە هێرشەکان بۆ سەر ئێران کردەوە.
ئێستا بەریتانیا لەژێر گوشارێکی زۆردایە بۆ هاوسەنگکردنی پەیوەندییەکانی لەگەڵ ئەمریکا و پاراستنی ئاسایشی ناوخۆیی خۆی لە بەرامبەر هەڕەشەکانی تاران، لە کاتێکدا ئەم پێشهاتە نوێیانە ئەگەری فراوانبوونی شەڕەکە زیاتر دەکەن.
