رووداو دیجیتاڵ
عەلی فالح زەیدی، سەرۆکوەزیرانی عێراق بە سەردانێکی فەرمی و بە سەرۆکایەتیی شاندێکی باڵای حکومی و بازرگانی گەیشتە واشنتن. بڕیارە رۆژی سێشەممە لەگەڵ دۆناڵد ترەمپ کۆببێتەوە و پەرە بە مۆدێلێکی نوێی پەیوەندیی نێوان هەردوو وڵات بدەن کە لەسەر بنەمای ئابووری و وەبەرهێنان دامەزراوە.
ئێوارەی رۆژی دووشەممە 13-07-2026، فڕۆکەی سەرۆکوەزیرانی عێراق لە واشنتنی پایتەختی ئەمریکا نیشتەوە. دیار کوردە، بەڕێوەبەری نووسینگەی رووداو لە واشنتن رایگەیاند: "ئامادەکاری و رێکاری ئەمنی تووند لە دەوروبەری ئەو هۆتێلەی سەرۆکوەزیرانی لێ دەمێنێتەوە گیراوەتەبەر."
بەگوێرەی خشتەی سەردانەکە، بڕیارە رۆژی سێشەممە کاژێر 11:00ـی بەیانی بەکاتی واشنتن (06:00ـی ئێوارە بەکاتی هەولێر)، عەلی فالح زەیدی لە کۆشکی سپی لەگەڵ دۆناڵد ترەمپ، سەرۆکی ئەمریکا کۆببێتەوە. پێش ئەو دیدارەش، زەیدی لەگەڵ تۆم باراک، نێردەی تایبەتیی ترەمپ کۆدەبێتەوە.
سەرۆکوەزیرانی عێراق بۆ ماوەی 8 بۆ 9 رۆژ لە ئەمریکا دەمێنێتەوە و شاندێکی گەورەی لەگەڵدایە کە پێکهاتووە لە 44 بەرپرسی باڵا و ژمارەیەک بازرگان و نوێنەری کۆمپانیاکانی عێراق و هەرێمی کوردستان.
بەگوێرەی راگەیێندراوێکی نووسینگەی راگەیاندنی سەرۆکوەزیرانی عێراق، سەردانەکە لەسەر بانگهێشتی فەرمیی دۆناڵد ترەمپ، سەرۆکی ئەمریکا بووە و ئامانج لێی پەرەپێدانی پەیوەندییەکانی نێوان بەغدا و واشنتن و بەهێزکردنی هاوبەشیی ئابووری و گەشەپێدانە.
لە راگەیێندراوەکەدا هاتووە، عێراق دەیەوێت لە رێگەی ئەم سەردانەوە وەبەرهێنانی زیاتر رابکێشێت و رۆڵی کۆمپانیا ئەمریکییەکان لە جێبەجێکردنی پڕۆژەکانی ژێرخان، کەرتی وزە، نەوت و گاز فراوانتر بکات، ئەمە جگە لە بەرزکردنەوەی توانای نێوخۆیی بۆ بەرهەمهێنانی بەرهەمە نەوتییەکان و پیشەسازیی پترۆکیمیاوی بە مەبەستی هەمەجۆرکردنی سەرچاوەکانی داهاتی نیشتمانی.
بڕیارە لە میانی سەردانەکەیدا، عەلی فالح زەیدی لەگەڵ دۆناڵد ترەمپ، سەرۆکی ئەمریکا و بەرپرسانی باڵای حکومەتی ئەو وڵاتە کۆببێتەوە، هەروەها زنجیرەیەک دیداری لەگەڵ نوێنەرانی کەرتی بازرگانی و ئابووریی ئەمریکا دەبێت بۆ تاوتوێکردنی چەندین دۆسیەی ستراتیژی کە ئامانجیان چەسپاندنی بنەماکانی هاوبەشیی نێوان هەردوو وڵاتە لەسەر بنەمای بەرژەوەندیی هاوبەش.
ئەم سەردانە وەک وەرچەرخانێک لە پەیوەندییەکانی بەغدا و واشنتن دەبینرێت؛ پێشتر پەیوەندییەکان زیاتر لە چوارچێوەی ئەمنی و نەوتدا بوون، بەڵام ئێستا عێراق دەیەوێت لە رێگەی ئابووری، وەبەرهێنان و هێنانی تەکنەلۆژیاوە پەیوەندییەکان پەرەپێبدات.
حکومەتی عێراق پلانی هەیە زیاتر لە 15 رێککەوتن و گرێبەستی ستراتیژی لەگەڵ کۆمپانیا زەبەلاحەکانی ئەمریکا لە بوارەکانی وزە، تەکنەلۆژیا، تەندروستی و کشتوکاڵ واژۆ بکات.
لە کەرتی تەکنەلۆژیادا، عێراق کار دەکات بۆ هێنانی خزمەتگوزارییەکانی "ستارلینک" و پەرەپێدانی ژێرخانی گەیاندن لەگەڵ کۆمپانیای "سیسکۆ". لە کەرتی وزەشدا، باس لە پڕۆژەی بۆریی نەوتی عەقەبە و پڕۆژەکانی وزەی خۆر دەکرێت.
هەروەها بڕیارە رێککەوتن لەگەڵ کۆمپانیا گەورەکانی وەک (ExxonMobil, Chevron, Halliburton) بۆ پەرەپێدانی کەرتی نەوت و غاز واژۆ بکرێت، لەگەڵ پڕۆژەی تەندروستی لەگەڵ دامەزراوەی (Carling Cross)ـی ئەمریکی.
سەرۆکوەزیرانی عێراق بە پەیامێکی روونەوە چووەتە واشنتن، ئەویش پابەندبوونی حکومەتەکەیەتی بە چاکسازی و سنووردارکردنی چەک لەدەستی دەوڵەت، تاوەکو ژینگەیەکی گونجاو بۆ کۆمپانیا ئەمریکییەکان بڕەخسێنێت. جێبەجێکردنی "ئۆپراسیۆنی بەرەبەیان" وەک یەکێک لە بەڵگەکان بۆ سەپاندنی دەسەڵاتی یاسا خراوەتەڕوو.
تۆڕی میدیایی رووداو وەک تەنیا میدیای کوردستان یاوەریی ئەم سەردانە دەکات. عەلی جاف، بەڕێوەبەری پەیوەندییە گشتییەکانی رووداو لەگەڵ شاندەکەدایە و سات بە سات وردەکاریی کۆبوونەوە و رێککەوتنەکان بۆ بینەران و خوێنەرانی رووداو دەگوازێتەوە.
