ترەمپ: پارەی ئێران دەبێت بۆ خۆراکی خەڵک بێت نەک بۆ پیشەسازیی مووشەکیی

رووداو دیجیتاڵ

سەرۆکی ئەمریکا رایگەیاند، ئەگەر سزاکانی سەر تاران لاببرێن، دەبێ ئەو پارەیەی دەیگەڕێنەوە بۆ ئێران تەنیا بۆ دابینکردنیی خۆراک و پێداویستییەکانیی خەڵک بەکاربهێنرێن. ترەمپ هۆشداریی دا کە نابێت تاران ئەو پارەیە بۆ دووبارە بنیاتنانەوەی توانای سەربازیی و پیشەسازیی مووشەکیی بەکاربهێنێت، چونکە بە گوتەی ئەو ئێستا گەلی ئێران لە بارودۆخێکیی یەکجار سەختدا دەژین.

رۆژی دووشەممە 22ـی حوزەیرانی 2026، دۆناڵد ترەمپ لە لێدوانێکدا بۆ رۆژنامەنووسان ئاماژەی بەوە کرد، ئامانجی سەرەکیی لە لادانی سزاکان، باشترکردنیی بژێویی گەلی ئێرانە.

 ترەمپ جەختیی کردەوە، دانیشتووانی ئێران 91 ملیۆن کەسن و دەبێ حکومەتەکەیان بەرپرسیارانە مامەڵە لەگەڵ پارەکاندا بکات تاوەکو چیدیکە خەڵک لەو وڵاتەدا برسی نەبن. سەرۆکی ئەمریکا رژد بوو لەسەر ئەوەی واشنتن چاودێریی وردی رێڕۆی خەرجکردنی ئەو پارەیە دەکات کە دوای رێککەوتنەکە دەگەڕێنەوە بۆ تاران.

ترەمپ پێیوایە بەکارهێنانی پارە بۆ کەرتی سەربازیی، بارودۆخی سیاسیی ناوچەکە تێکدەدات و رێگریی لە ئاشتیی هەمیشەییی دەکات. ئەو ئاماژەی بەوە کرد، تاران دەبێت لەبری خەرجکردنیی پارە بۆ گرووپە بریکارەکان و پەرەپێدانیی چەک، سەرنجی بخاتە سەر تێرکردنیی گەلەکەی. ئەم لێدوانانەی ترەمپ لە کاتێکدایە کە هەوڵە دیپلۆماسییەکان بۆ واژۆکردنیی یاداشتنامەی ئیسلامئاباد گەیشتوونەتە قۆناخێکیی یەکلاکەرەوە.

جەنگی نێوان ئێران و ئەمریکا و ئیسرائیل لە 28ـی شوباتی 2026 دەستیپێکرد و بووە هۆی تێکچوونی باری ئابووریی جیهانیی.

 ئێستا دانوستاندنەکان گەیشتوونەتە قۆناخێکی یەکلاکەرەوە، تاران داوای ئازادکردنیی ملیارەها دۆلار لە پارە سڕکراوەکانیی دەکات وەک مەرجێک بۆ راگرتنیی شەڕ و کردنەوەی تەنگەی هورمز. لە کاتێکدا ترەمپ دەیەوێت لەرێگەی دیپلۆماسییەوە کۆتایی بە شەڕ بهێنێت، لە نێوخۆی واشنتن دڕدۆنگییەکی زۆر لەبارەی نیازپاکی تاران هەیە.